Serbët në komunat veriore të Kosovës raportohet të kenë dorëzuar te kryesuesit e kuvendeve komunale kërkesën për inicim të peticionit për largimin e kryetarëve aktual nga funksioni.
Lidhur me këtë, në një prononcim për Klankosova.tv zëdhënësi i Komisionit Qendror Zgjedhor, Valmir Elezi, ka thënë se kanë pranuar katër shkresa, tre prej të cilave kanë të bëjnë me plotësimin e formualarit për inicimin e kërkesës për peticion.
“Mund t’iu konfirmoj se gjatë ditës së sotme, në disa e-maila zyrtar, kemi pranuar katër e-maile, tri prej të cilave kanë të bashkëngjitur të plotësuar formularin për inicimin e kërkesës për largimin e kryetarit të komunës nga funksioni. Në këtë fazë, mund t’iu them se këto shkresa do të trajtohen dhe do t’iu informojmë për këtë”, ka deklaruar Elezi.
Ndërkohë, kryesuesi i Kuvendit të komunës së Mitrovicës së Veriut, Nexhat Uglanjin, ka mohuar që kanë pranuar ndonjë kërkesë të tillë.
Uglanjin ka thënë për Klankosova.tv se kërkesa nuk ka shkuar në adresën e kuvendit.
