Eksperti financiar, Milazim Abazi, ka vlerësuar se çështja e dinarit serb nuk mund te jetë pjesë e dialogut Kosovë – Serbi sepse sipas tij është çështje e brendshme.
Ai tha se kjo çështje nuk u bë temë në takimin e sotëm në Bruksel sepse nuk shkoi kryeministri Albin Kurti, por vetëm përfaqësuesit e BQK-së.
“Rregullorja e BQK-së dhe dinari nuk duhet të jetë temë e bisedimeve në Bruksel, besoj edhe se u realizua. Kryeministri që udhëheq dialogun nuk ka marrë pjesë në biseda. Këtë takim e konsideroj si një takim informues të Lajckaut për këtë çështje që është e brendshme dhe nuk ak të bëjë vetëm me serbët por me të gjithë qytetarët”, tha ai.
Abazi e kritikoi faktorin ndërkombëtarë duke thënë se po fusin tema të brendshme të Kosovës në dialog me Serbinë.
“Është qasje e gabuar e faktorit ndërkombëtarë dhe miqve tanë që po ndërmjetësojnë sepse çdo çështje nuk mund të bisedohet në dialog, është çështje e brendshme dhe ligjore dhe në pajtim me të gjitha rregullat, me rregullative. S’kemi pasur reagim të Bankës Qendrore Evropiane, sepse s’ka pasur asnjë Shkelje të ligjit”, tha ai.
