Dje në Bruksel është mbajtur takimi i përbashkët nën ndërmjetësimin e emisarit evropian për dialogun, Mirosllav Lajçak, lidhur me çështjen e dinarit serb në Kosovë.
Nga Kosova ka marrë pjesë guvernatori i Bankës Qendrore të Kosovës, Ahmet Ismaili. Kurse delegacioni nga Serbia udhëhiqej nga kryenegociatori Petar Petkoviq.
Njohësi i çështjeve politike në vend, Azem Vllasi, tha për RTK se tema e takimit nuk ka qenë politike, por Serbia dëshiron ta interpretojë ashtu.
Sipas tij, manipulon secilën temë që ka të bëjë me Kosovë.
“Krejt tema rreth dinarit është fryrë nga ana e Serbisë, për shkak se Kosova po merr kritika nga ato shtete që e kanë përkrahur Kosovën”, tha ai.
Vllasi tha se edhe po të shkonte Bislimi në Bruksel asnjë marrëveshje nuk do të arrihej.
