Prokurori i Shtetit ka autorizuar Policinë e Kosovës dhe njësitë relevante për ndërmarrjen e veprimeve me qëllim të ndriçimit të rrethanave të zjarrit në fabrikën e plastikës në Drenas.
Kështu ka konfirmuar zëdhënësja e Themelore në Prishtinë, Laureta Ulaj.
Ajo tha se “do të analizojnë dhe vlerësojnë në rast se paraqiten elemente të veprës penale”.
“Prokurori i Shtetit ka autorizuar Policinë e njësitë relevante për ndërmarrjen e veprimeve hetimore me qëllim të ndriçimit të rrethanave të këtij zjarri, si dhe do të analizojë e vlerësojë në rast se paraqiten elemente të veprës penale”, tha Ulaj.
Zjarri ka kapluar një fabrikë në Korreticë të Epërme të Drenasit që nga ora 11 e ditës së hënë.
Deri më tash nuk ka të lënduar nga shpërthimi i këtij zjarri, ndërkaq fabrika është djegur e tëra.
Kryetari i Drenasit, Ramiz Lladrovci ka thënë se ka aktivizuar shtabin emergjent të komunës në krye të të cilit është vetë ai.
Ai njoftoi se në vendin e ngjarjes kanë shkuar edhe njësitet e zjarrfikësve nga Malisheva, Lipjani, Prishtina e Skënderaj.
Për rastin është deklaruar edhe zëdhënësja e Policisë për rajonin e Prishtinës, Flora Ahmeti.
“Sot rreth orës 11:00, kemi pranuar informatën për një incident zjarri në një fabrikë në fshatin Korroticë e Epërme të Drenasit. Në vendngjarje janë zjarrfiksit dhe policia të cilët po merren me rastin. Për detaje njoftoheni me kohë”, tha Ahmeti.
