Ish-ambasadori gjerman në Bosnje e Hercegovinë dhe ish shef i zyrës Gjermane në Prishtinë, Michael Schmunk, në ‘Lajmet e fundit” në RTK ka folur për situatën politike në Ballkanin perëndimor me theks të veçant për proceset nëpër të cilat po kalon Kosova.
Ish-diplomati gjerman, ka theksuar se Kosova ka kaluar në një periudhë të komplikuar, e cila burimin e ka te Serbia. Por siç ka thënë ai Kosova ka arritur ta menaxhojë mirë situatën.
Schmunk ka folur për marrëveshjen e Brukselit, duke thënë se kryeministri i Kosovës Alabin Kurti kishte vullnet për të nënshkruar marrëveshjen, por ishte presidenti serb Vuçiq që nuk ishte i gatshëm ta bëjë një gjë të tillë.
“Rekomandimi im është që Kosova të vazhdojë të jetë e qetë, që të vazhdojë të demonstrojë vullnetin për ta nënshkruar atë. Unë besoj se marrëveshjet janë të mira e të drejta”, ka thënë ai.
Për këtë ai ka thënë se Kosova duhet të vazhdojë të konsultohet me Washtingonin dhe Brukselin. “Por unë besoj se topi është në fushën e Serbisë e jo të Prishtinës”, ka theksuar Schmunk.
Ish-ambasadori gjerman, Michael Schmunk në këtë intervistë për RTK-na ka folur edhe për mundësinë e anëtarësimit të Kosovës në NATO.
“Shpresojmë që Kosova do të arrijë edhe në NATO edhe në BE sa më shpejtë që është e mundur. Mendoj se i mbetet perëndimit që ta mbështesë Kosovën kudo që është e mundur që të bëhet ky lloj përafrimi”, tha ish-diplomati gjerman.
Ai ka theksuar se Qeveria në Berlin është duke punuar fort që të përshpejtojë procesin për Ballkanin perëndimor.
