Gjatë ditës së djeshme, u publikua një bisedë e shkurtër mes shefes së grupit parlamentar të Lëvizjes Vetëvendosje, Mimoza Kusari-Lila dhe kriminelit serb Milan Radoiçiq.
Biseda më pak se një minutë ishte ndërmjetësuar nga Sllavko Simiq i Listës Serbe.
Kjo gjë nxiti reagime të shumta, të cilat erdhën kryesisht nga kundërshtarët politikë të kryeministrit Albin Kurti dhe Lëvizjes Vetëvendosje.
E për këtë audio-incizim, ka reaguar për herë të parë Lëvizja Vetëvendosje, më saktë zëdhënësi i saj Arlind Manxhuka.
Ai në një postim në Facebook tha se personat që kanë bërë biznese, koalicioni e qeveri me Radoiçiqin, nuk mund t’ia bëjnë LVV-së gjyqin sot, përcjell “Bota sot”.
Manxhuka tha se me partinë e tyre në pushtet, “Radoiçiq ikë maleve me bisht nën shalë, e nuk zë vend në karrigat e zyrës së Kryeministrit”.
Postimi i plotë
Trashëgimia e keqe e tyre nuk bëhet dot mëkat i yni. Ata që kanë bërë biznese, koalicione, qeveri e miqësi me Radoiçiqin nuk mund të na bëjnë gjyqin neve sot. Me neve Radoiçiq ikë maleve me bisht nën shalë, e nuk zë vend në karrigat e zyrës së Kryeministrit. Kjo është sa për përkujtim për të gjithë korin kritikues e akuzues që i kemi dëgjuar dje e sot. Tjerat i gjykon më së mirë qytetari. Ai më së miri e di se ku ishte Lista Serbe dhe Radoiçiq para qeverisë sonë, dhe ku janë sot.
