Gazetari Vehbi Kajtazi ka deklaruar se Muharrem Qerimi, i arrestuar për spiunazh me BIA-n serbe, është i përfshirë me anëtarë të Partisë Demokratike të Kosovës, pjesëtarë të ish-Shërbimit Informativ të Kosovës dhe së fundmi edhe me Lëvizjen Vetëvendosje.
Kajtazi ka deklaruar se Qerimi ishte pjesëtar i policisë së Kosovës dhe si njëjti ishte kamufluar si një pjesëtar i shërbimit britanik.
Përpos pjesëtar i policisë, Qerimi ka edhe një vëlla i cili ishte pjesëtar i Policisë së Kosovës. Vëllau i tij, Shpend Qerimi, është i dënuar me 25 vjet burgim për shkak të shpërthimit në lokalin Sekiraça dhe për një vrasje të trefishtë në Kaçanik.
“Muharrem Qerimi ka qenë polic i Kosovës, ai thotë se e kanë larguar për shkak se e ka luftuar krimin, me pretendimet gjithmonë se punon me shërbimin britanik duke aluduar se ka shumë informacione e materiale të shumta. Muharremi e ka një vëlla në burg, e ai është Shpend Qermi, i dënuar me 25 vjet burgim për shpërthimin në lokalin Sekiraqa dhe i dënuar për një vrasje të trefishtë në një fshat të Kaçanikut”, deklaroi gazetari Kajtazi.
Sipas Kajtazit, Shpendi e Muharremi nuk kishin punuar të vetëm. Pas tyre qëndronin pjesëtar të PDK-së dhe ShIK-ut.
“Shpendi ka qenë i përfshirë në atë shpërthim por nuk ishte i vetmi aty, pas tij ishin njerëz të PDK-së e ShIK-ut e në mesin e tyre edhe Nysret Cena i vrarë në vitin e kaluar për të cilin nuk flitet më, ndërsa këta pretendojnë se shef e kanë pasur Elmi Reçicën. Kjo është një bandë kriminale e anës së Kaçanikut dhe Ferizajt”, deklaroi Kajtazi.
Përpos lidhjes me PDK-n e ShIK-un, Kajtazi ka dhënë edhe një detaj interesant.
Sipas informatave të tij, kanë qarkulluar lajme se vëllau tjetër i Muahrrem Qerimit, Ilir Qerimi është këshilltar i ministrit të punëve të brendshme, Xhelal Sveçla.
“Vëllau i tyre është këshilltar i Xhelal Sveçlës, por nuk ka një dokument zyrtar. Ai e mohon se është pjesë e kabinitetit të tij, por thekson se është fans i Vetëvendosjes. Tani Iliri, Shpendi e Qerimi akuzojnë AKI-in për përfshirje në këtë rast, për shkak se ata kanë dhënë dëshmi të shumta te prokuroja Marie Bamhe”, deklaroi ai.
