Nënkryetari i PD-së, Agron Gjekmarkaj ka bërë një shkrim me titullin “Kryqi mbi kokën e Ismail Kadaresë!”.
E ndaj këtij shkrimi ka reaguar publicisti Gani Mehmetaj, ku këtë shkrim e cilësoi si marrëzi të Gjekmarkajt.
Për këtë, Mehmetaj reagoi edhe ndaj Tomor Avdiut, ku ky i fundit kishte deklaruar se “Kadareja ka qenë mysliman, prandaj nuk duhej të futej nën kryqin e Shenjtores Terezë”.
Ai nuk i kurse kritikat, duke hedhur dyshime se mos këto deklarata kanë prapavijë të frikshme.
“A thua kaq shumë janë marrosur Berisha me militantët e vet pas fesë islame? Apo ka një prapavijë të frikshme, krusmë, si do të thoshte Ismail Kadare”, shkroi ndër të tjera Mehmetaj, përcjell “Bota sot”.
Postimi i plotë
Marrëzia e Agron Gjekmarkajt dhe deklarata e militantit të marrosur
E lexova një marrëzi të Agron Gjekmarkajt “Kryqi mbi kokën e Ismail Kadaresë!”, që ia hapi rrugën një gjysmë analfabeti tropojan (Tomor Avdiu) me vendqëndrim në Prishtinë, militant i PD-së së Berishës.
Tropojani që nuk i mësoi kurrë as të 30 shkronja e shqipes derisa ishte gazetar, sot në TV Dukagjini tha: Kadareja ka qenë mysliman, prandaj nuk duhej të futej nën kryqin e Shenjtores Terezë. Foli edhe marrëzira të tjera, në stilin e shefit të vet Berishës, që pamjen e shëmtuar të faljes së beduinëve në Tiranë, e quante madhështore!
A thua kaq shumë janë marrosur Berisha me militantët e vet pas fesë islame? Apo ka një prapavijë të frikshme, krusmë, si do të thoshte Ismail Kadare.
