Vizita që pritet ta realizojë kancelari gjerman, Olaf Scholz në Beograd dhe takimi me Aleksandër Vuçiqin, përcjell një “mesazh shumë negativ, pasi presidenti serb sërish po lihet i lirë dhe nuk po vihet para drejtësisë”.
Kështu ka vlerësuar Andi Hoxhaj, profesor në Londër, i cili në emisionin FIVE ka theksuar se Vuçiq sërish nuk po merr përgjegjësi për mënyrën se si është sjellë me Kosovën.
“Vizita është e papritur, për shkak sepse ne po e marrim vesh vetëm nga mediat dhe është raportuar nga disa këshilltarë por marrëveshja ka kohë që është negociuar, edhe është shumë e qartë se BE-ja po kërkon që ta diversifikojë ekonominë e saj. Dhe litiumin që pritet të nënshkruaj nga marrëveshja me Beogradit do të përmbush të paktën 17 për qind të kërkesave që BE-ja ka, për sa i përket produkti të makinave elektrike”, ka thënë ai.
“Por sa i përket mesazhit që përçon pastaj është tejet negativ, për arsye sepse Vuçiq përsëri po lihet i lirë dhe përsëri nuk po sillet përpara përgjegjësisë qoftë mënyra se si është sjellë me Kosovën, qoftë me fqinjët e vet dhe brenda gjithashtu. Kjo do të japë një mesazh negativ që përsëri nuk po sillet përpara drejtësisë por po lihet i lirë”, ka deklaruar Hoxhaj tutje në emisionin FIVE.
Po ashtu, ai ka thënë se kjo është një fitore deri diku për politikën e jashtme të Vuçiqit, “sepse po e tregon se ai është i aftë të vijë me pranë BE-së dhe gjithashtu po e tregon vetën se është një faktor i rëndësishëm për BE-në”.
Media amerikane, Politico ka raportuar me burime se Scholz planifikon të udhëtojë në Beograd të premten për të marrë pjesë në nënshkrimin e një marrëveshjeje bashkëpunimi midis BE-së dhe Serbisë për importimin e mineraleve, përfshirë litiumin, që janë kritike për tranzicionin dixhital dhe të gjelbër të BE-së.
