“Dritën jeshile” për lëvizje të lirë për serbët e veriut që janë të pajisur me dokumenta të lëshuara nga institucionet ilegale në Kosovë, nënkretarja e PDK-së, Mimoza Ahmetaj po e sheh si cenim të integritetit territorial të vendit tonë.
Ahmetaj ka shprehur indinjatë për këtë vendim të Bashkimit Evropian, duke thënë se në këtë formë po cenohet edhe integriteti institucional i Kosovës.
“Shpreh indinjatën time për një vendim të tillë të Bashkimit Evropian duke marr parasysh që njohja e pasaportave të lëshuara nga institucionet ilegale në Kosovë, në një formë do ta legjitimojë edhe prezencën e institucioneve ilegale serbe në Kosovë për me tepër do të jetë shenjë e cenimit të integritetit territorial dhe institucional të Kosovës”, është shprehur ajo.
Sipas Ahmetajt, vendimi i djeshëm për vizat, tregon gjendjen e mjerë në të cilën sipas saj gjendet kryeministri, Albin Kurti.
“Ky nuk ka qenë vendim i papritur, por është një cikël i vendimeve. Për më tepër kreu i ekzekutivit e ka pasur një mundësi të tillë që të lobojë të kontaktojë me krerë të shteteve anëtare, po edhe njëherë vendimi i djeshëm tregon situatën e mjerë në të cilën gjendet Kurti dhe për më tepër faturën e gjendjes së tij, po e paguan Kosova’, ka shtuar ajo.
