Ish-komandanti i Ushtrisë Çlirimtare të Kosovës, Hasan Preteni, i ftuar në emisionin “Fakte me Adnan Merovcin” mes temave të trajtuara në këtë bashkëbisedim, ndër tjera ka folur për ‘thesarin’ që e posedon si një ish-ushtarak.
Bëhet fjalë për ditarin e tij, në të cilin gjenden të përshkruara ditët që Preteni me batalionin e tij i kaloi në luftë.
Autori i këtij ditari, teksa tregoi se si funksiononin ushtarët e tij gjë vitit 1998-1999, tha se çdo ditë në të aso kohe shkroi për numrin e armatimit.
“Për të gjitha këto çka i them, e kam ditarin e luftës, që është aset të cilin, mos të largohem prej modestisë, por as me pasurinë e Bill Gates nuk e jepi. I kam shënuar për çdo ditë aktivitetet luftarake. Kam shënime për secilin prej ushtarëve, cili person, emrin, emrin e babës, mbiemrin, vitin e lindjes, përgatitjen profesionale ushtarake, a e ka kryer shërbimin ushtarak në APJ apo në ndonjë trajnim tjetër, armatimin çfarë e ka, sa municion dhe numrin e armatimit”, u shpreh Preteni.
Ai gjithashtu tha se në fund i ka edhe vlerësimet me nota përshkruese që ua kishe dhënë ushtarëve të tij për punën e tyre.
Jo vetëm kaq, Preteni tregoi se në këtë ditar posedon edhe harta apo skica të rrugëve.
