Kryetari i AAK’së, Ramush Haradinaj, ka takuar sot përfaqësuesit e shoqatave të dala nga lufta.
Ai ka thënë se është i shqetësuar me situatën e rënduar të pjesëtarëve të kartegorive të luftës.
“I shqetësuar tej mase me situatën e rënduar të pjesëtarëve të kategorive të lirisë. Të dhënat që sot u prezantuan nga përfaqësues të shoqatave të dala nga lufta, në një tryezë të organizuar nga Aleanca për Ardhmërinë e Kosovës, flasin për një situatë alarmante. Veteranët me paga qesharake, invalidët pa asistencën e nevojshme shëndetësore, familjet e dëshmorëve në harresë totale”, ka thënë Haradinaj.
Haradinaj ka shtuar se AAK do të jetë e vendosur që ta rikthejë dinjitetin e luftëtarit, të veteranit, të invalidit por edhe të familjeve të dëshmorëve të lirisë.
“Kjo shoqëri duhet që urgjentisht ta rikthejë dinjitetin e kategorive të lirisë, pjesëtarët e të cilave janë më meritorët për lirinë që e gëzojmë sot. Aleanca do të jetë e vendosur që ta rikthejë dinjitetin e luftëtarit, të veteranit, të invalidit por edhe të familjeve të dëshmorëve të lirisë. Ata që e harrojnë të shkuarën, rrezikojnë që ajo t’u përsëritet”, ka thënë Haradinaj.
