Avokati i autorizuar nga familja Hajrizi, Arianit Koci ka folur për vizitën e fundit që kishte në Serbi, për të parë nga afër kufomën e Faton Hajrizit.
Ai foli edhe për procedurat ligjore se si do të sillet trupi i Faton Hajrizit në Kosovë.
Lidhur me deklarimin e tij, ka reaguar eksperti i sigurisë, Bedri Elezi përmes një postimi në Facebook. Ai shkruan se këtë rast është duke e hetuar një prokuror special i terrorizmit, mirëpo emri i tij nuk bëhet i ditur për shkak të ndjeshmërisë së rastit.
“I autorizuari i familjes Hajrizi z.Koci ështê deklaruar sërish për rastin e Faton Hajrizit. Gjatë intervistelës së tij, ai deklaroj se rasti është shumë i ndjeshëm sa që një prokuror special i terrorizmit është duke zhvilluar hetimet. Madje avokati tha se identiteti i prokurorit nuk tregoj pikërisht për shkak të një ndjeshmërisê së rastit”, shkruan ai.
Sipas ekspertit Elezi, ajo që i bëri përshtypje nga deklaratat e avokatit Koci, ishte paralajmërimi i tij, në lidhje me rrezikun se kufoma mund të varrosej në varrezat sociale dhe ky rast të mbyllej.
“Kjo deklaratë vërtet më befasoj, se një rast ku prokuroria speciale e Serbisë, përkatësisht departamenti i terrorizmit është angazhuar, ngase ky rast është klasifikuar si vepër e terrorizmit, do të mbyllej në këtë mënyrë, e sidomos kur kemi parasysh se ky rast është tejet kompleks, e veçanërisht kur kemi parasysh faktin se të arrestuar në këtë rast kemi 3 persona, dhe poashtu edhe një përpjekje për të sjellur para drejtësisë vllaun e Faton Hajrizit, Artanin. Në asnjë mênyrë nuk mund ta kuptoj këtë se Serbia do ta mbyllte këtë rast tejet kompleks, e sidomos nëse marrim parasysh deklaratat e Presidentit të Serbisë se Faton Hajrizi ishte në lidhje me shërbimet sekrete të huaja, dhe po planifikonte aktivitete terroriste në republikën Sërbska në Bosnjë”, shkruan Elezi.
