Kryeministri i vendit, Albin Kurti dhe ministri i Shëndetësisë, Arben Vitia gjatë përurimit të Klinikës Emergjente në QKUK, janë pyetur për implantet stomatologjike, pasi tash e shtatë muaj janë bërë vetëm dy implante dhe shuma e tyre është 400 euro, ose e përafërt me atë të sektorit privat.
Kurti është përgjigjur se nuk është në dijeni për implantet as nga përvoja, e as nga të dhënat.
Kurti: Nuk jam në dijeni sa implante janë bërë në Klinikën Stomatologjike
“Nuk jam në dijeni sa implante janë vërë në Klinikën Stomatologjike as nga përvoja, e as nga të dhënat”, ka thënë ai.
Ndërsa, ministri Vitia ka thënë se grupi punues brenda Ministrisë së Shëndetësisë, bashkë me profesionistët e fushës nga stomatologjia janë në përfundim të udhëzimit të ri dhe çmimores së re.
Vitia: Është në përfundim udhëzimi dhe çmimorja e re
“Janë bërë investime të theksuara dhe shumë të nevojshme në stomatologji, një prej tyre është edhe implanti. Është e vërtetë që ka qenë një udhëzim administrativ i cili i ka pasur çmimet jo në nivelin i cili duhet të jetë për qytetarët e Republikës dhe menjëherë pas këtyre investimeve dhe shërbimeve të reja gjatë këtij viti, që kanë qenë tre, grupi punues brenda Ministrisë së Shëndetësisë, bashkë me profesionistët e fushës nga stomatologjia janë në përfundim të udhëzimit të ri dhe çmimores”, ka shtuar ai.
