Kanë përfunduar ushtrimet e ushtarëve të KFOR-it nga Ura e Ibrit pas disa orësh.
Ekipi i medias është duke qëndruar në veri të Mitrovicës, ku raportohet edhe largimi i automjeteve të KFOR-it pas përfundimit të trajnimit.
Më herët u raportua për shtimin e forcave të KFOR-it, mbi Urën e Ibrit, ku sipas karabinierëve, forcat e shtuara janë si vazhdim i trajnimit të së shtunës.
Kurse edhe ditë më parë janë parë trupa e automjete të shtuara të KFOR-it mbi Urën e Ibrit.
Ndryshe, KFOR-i ka prani të përhershme në urën mbi lumin Ibër.
Qeveria e Kosovës në mes të korrikut njoftoi se synon të hapë urën kryesore mbi lumin Ibër në Mitrovicë. Megjithatë, vendet e QUINT-it deklaruan se nuk e mbështesin hapjen për trafik të Urës në këtë moment.
Ndërkohë Misioni i NATO-s në Kosovë, KFOR-i, deklaroi se çdo vendim për hapjen e urës kryesore mbi lumin Ibër duhet të merret në kuadër të dialogut mes Kosovës dhe Serbisë, që ndërmjetësohet nga Bashkimi Evropian.
KFOR-i e “blindon” sërish Urën e Ibrit
Forca të shtuara të KFOR-it, janë parë sërish sot tek Ura e Ibrit.
Pozicionimi aty raportohet të ketë ndodhur rreth orës 10.30 të mëngjesit.
Ata krijuan dy kordona në anën veriore dhe jugore të urës dhe rreth tridhjetë prej tyre u pozicionuan me pajisje të plota, ndërsa kalimi për këmbësorët ishte i papenguar.
Në një deklaratë të ditëve më parë të dhënë, KFOR-i tha se dislokimi i trupave aty, vijon si pjesë e një trajnimi të paraparë në planet e tyre, për të mbrojtur standardet më të larta operacionale.
”KFOR-i gjithashtu mban një prani fikse në urën kryesore mbi lumin Ibër në Mitrovicë dhe vazhdon të kryejë patrullime të rregullta në zonat përreth”.
”KFOR-i po monitoron situatën e sigurisë në veri të Kosovës dhe mbetet vigjilent. Është i vendosur të marrë të gjitha masat e nevojshme për të vazhduar përmbushjen e mandatit të saj të OKB-së dhe për t’iu përgjigjur çdo zhvillimi të mëtejshëm përkatës”, thuhej nga KFOR.
