Prokuroria Speciale e Kosovës ka ngritur aktakuzë ndaj 45 personave, përfshirë edhe Millan Radoiçiqin, lidhur me sulmin e armatosur në Banjskë.
Megjithatë, ish-hetuesi policor, Visar Rrecaj e ka cilësuar këtë veprim si të parakohshëm dhe me ndikime politike.
“Nuk i duhet Kosovës një aktakuzë e ngutshme që mund të ketë defekte gjatë rrugës. Prokuroria ka pasur plot tri vite për hetime dhe ngritja e aktakuzës në mungesë të të pandehurve mund të sjellë probleme”, ka deklaruar Rrecaj.
Ai ka shtuar se presioni për të nxjerrë aktakuzë ka ardhur kryesisht nga Qeveria e Kosovës, duke e quajtur atë të pajustifikuar dhe joetik.
“Çdo presion i ushtruar ndaj Prokurorisë Speciale që sa më shpejt të dalë më një aktakuzë ka qenë i paarsyeshëm dhe jo ligjor e jo etik në secilin drejtim. Nuk mund të themi se ka pasur presion publik, por presioni ka qenë politik, dhe kryesisht prej Qeverisë së Kosovës dhe një presion absolutisht pa kurrfarë karakteri sepse nuk i duhet Kosovës e as Prokurorisë as publikut një aktakuzë e ngutshme, e cila mund të jetë me defekte gjatë rrugës sepse po bëhet fjalë për aktakuzë që në drejtësi nënkupton që faza e hetimeve është arritur në fazën e dytë. Kjo aktakuzë do të kalojë në shqyrtim gjyqësor e pastaj është faza e ankesave ne jemi në gjysmë të rrugës.
“Por, unë konsideroj që është e ngutshëm, dhe e hershem sepse prokuroria i ka pasur plotë tre vite për me hetu, ngritja e aktakuzës tani për tani në mungesë të të pandehurve ka me paraqitë shumë probleme sepse mua nuk do të më kënaqte një aktgjykim dënues ndaj personave në mungesë sidomos për rastin Banjska, për faktin se për një rast të tillë kaq të madh mua personalisht nuk më përmbushë. Prokuroria ka rënë pre e ndikimeve politike dhe kërkesave të vazhdueshme sidomos prej eksponentëve politik ku kërkojshin aktakuzë. Kjo Prokurori është dashur deri dy ditë para kalimit të afatit me kry hetime edhe kryesisht me u përqendru te arrestimi”, ka deklaruar Rrecaj.
