“Më mirë vonë se kurrë”, ky ishte reagimi i kreut të Kuvendit, Glauk Konjufca pas ngritjes së aktakuzave për 45 terroristët e Banjskës.
Ai kërkoi që procesi për të dhënë drejtësi për vrasjen e rreshterit policor Afrim Bunjaku të vijojë pa vonesa.
"Ky po që është një lajm i mirë dhe një lajm për të cilën nuk dua të jap kritikat më pastaj të tjera pse u vonua kaq shumë por do të thosha se fraza më e mire që i shkon kësaj është 'më mirë vonë se kurrë' dhe kështu ka ndodhur”, tha Glauk Konjufca kryetar i Kuvendit.
Ministrja e Drejtësisë, Albulena Haxhiu, deklaroi se në vazhdimësi kanë shprehur shqetësimet për mungesën e aktakuzës për Milan Radoiçiç edhe për faktin se në vitin 2021 atij i ishte tërhequr një urdhërarrest që, sipas Haxhiut, mund ta parandalonte “Banjskën”.
“Kemi shprehur shqetësimet tona sepse dihet qëllimet që ka pasur Serbia, dihet që ai grup terrorist i financuar nga Serbia dhe është trajnuar atje në bazat e tyre të trajnimit prandaj edhe kemi kërkuar një hetim ndërkombëtar për këto baza të trajnimit dhe ne mirëpresim ngritjen e aktakuzave për kryeterroristin Milan Radoiçiç dhe terroristët tjerë”, u shpreh Albulena Haxhiu, ministre e Drejtësisë.
Haxhiu kërkoi nga ndërkombëtarët që të bëjnë presion mbi Serbinë në mënyrë që të dorëzojë Milan Radoiçiçin dhe terroristët e tjerë në Kosovë.
Ajo tha se kanë refuzuar t’i përgjigjen kërkesës së Serbisë për bashkëpunim për këtë rast pasi atje po bëhet kinse po hetohet kjo ngjarje.
