Shqipëria mbështet Kosovën në përpjekjet dhe arritjet e saj, për vendosjen e sundimit të ligjit në të gjithë territorin e vendit.
Është ky mesazhi që vjen nga ministri i jashtëm shqiptar, Igli Hasani, për një vjetorin e sulmit terrorist nga grupi i armatosur serb në Banjskë.
Kryediplomati nderon sakrificën e heroit Afrim Bunjaku dhe thekson se është e papranueshme që autorët e këtij krimi mbeten ende të lirë.
“Drejtësia duhet të vihet në vend pa vonesa dhe justifikime”, shkruan Hasani në një deklaratë. Ministri shton se Shqipëria mirëpret vendimin e Prokurorisë së Kosovës, për të ngritur aktakuzë kundër të dyshuarve për organizim dhe kryerje të këtij sulmi brutal.
“Llogaridhënia është element kyç për parandalimin e përshkallëzimeve dhe konsolidimin e paqes në të gjithë rajonin”, përfundon mesazhin e tij Hasani.
