Deputeti nga Lëvizja Vetëvendosje, Armend Muja konsideron se është e nevojshme që të mbetet në fuqi masa e sigurisë ndaj mallrave serbe. Ndërsa, këto ditë Gjermania ka paralajmëruar se Kosova mund të përjashtohet nga nismat rajonale tregtare, nëse vazhdon të ngulë këmbë në ndalesën ndaj importit të mallrave nga Serbia.
Përveç kësaj, qeveria po mbaron mandatin 4-vjeçar dhe ende nuk ka siguruar asnjë njohje për shtetin e Kosovës. Derisa deputeti Muja arsyetohet se fokusi i kësaj qeveria ka qenë tek shtrirja e sovranitetit në tërë vendin.
Në një intervistë për KP, Muja shprehu optimizëm për rritjen ekonomike të Kosovës, duke parashikuar se ajo do të jetë rreth 5 për qind, përkundër prognozës së Bankës Qendrore prej 3.9 për qind.
Ndërsa, ka theksuar se Kosova ka qenë pjesëmarrëse konstruktive në proces, mirëpo tash një vit, tregtia e lirë është keqpërdorur nga Serbia për të armatos veriun e vendit, siç thotë ai, tregtia e lirë është abuzuar dhe Kosova ka nevojë për masa shtesë.
Muja: Tregtia e lirë është abuzuar dhe Kosova ka nevojë për masa shtesë
“Ne kemi qenë si vend i përkushtuar ndaj tregtisë së lirë, në fakt tregtia e lirë, liria e lëvizjes së kapitalit, liria e lëvizjes së fuqisë punëtore, liria e lëvizjes së mallrave dhe shërbimeve kanë qenë disa vlera që ne kemi promovuar si Kosovë historikisht edhe në bashkëpunimet tona rajonale edhe në Procesin e Berlinit kemi qenë të parët në Kuvend që kemi miratuar gjitha masat ose dakordimi që ka propozuar në kuadër të dialogut të RSS, lëvizja vetëm me letërnjoftime. Kosova ka qenë pjesëmarrëse konstruktive në proces, mirëpo tash një vit, tregtia e lirë është keqpërdorur nga Serbia për të armatos veriun e vendit dhe tash tregtia e lirë është abuzuar dhe Kosova ka nevojë për masa shtesë që të sigurohet që këto vlera fisnike po ashtu të sjellin benfiit për gjithë njerëzit dhe të mos keqpërdoret nga liderë autoritar dhe nga struktura kriminale të Radojiçiq për të cenuar sigurinë fizike apo integritetin e Kosovës”, deklaron Muja.
Kryetari i Komisionit për Buxhet dhe Financa, Armend Muja ka shtuar se rritja ekonomike deri në fund të vitit pritet të jetë rreth 5 për qind.
Muja: Nuk parashoh se rritja ekonomike të jetë nën 5 për qind
“Rritja ekonomike e këtij viti është parashikuar nga Banka Qendrore të jetë 3.9 për qind, megjithatë këto projeksione në dy, tre mujorët e parë janë tejkaluar dhe rritja ekonomike në tre mujorin e parë dhe tre mujorin dytë që është gjashtë muajt e parë është pesë për qind, që është përtej projeksioneve, dhe besoj se është më e mundshme të presim që konsideruar edhe faktin se vera, ky tremujor, por edhe tre mujori i fundit zakonisht në Kosovë kanë performancë më të mirë, unë nuk parashoh se rritja ekonomike të jetë nën 5 për qind”, thotë Muja.
Në lidhje me njohjet e reja për vendin tonë, ai theksoi se këto ide janë pjesë e programeve të qeverive të kaluara, duke theksuar se qeveria e tanishme është fokusuar në shtrirjen e sovranitetit në çdo cep të vendit.
Muja: Këto ide të për njohje kanë qenë programe të qeverive të kaluara
“Qeveria duhet të matet me programin e saj, dhe preferencë duhet të shërbejë premtimi ose programi qeveritar, këto ide për njohje kanë qenë programe të qeverive të kaluara. Sigurisht është rritja, forcimi i subjektivitetit ndërkombëtar të Kosovës, është një aspekt i rëndësishëm mirëpo në rastin tonë ka qenë e rëndësishme sovraniteti i brendshëm ose kompletimi i shtet formimit që autoriteti i Kosovës shtrihet në çdo cep të territorit, sepse ajo pastaj është përdorur si për të justifikuar kampanjën e ç’njohjes, ashtu është përdorur edhe si kundër peshë negociuese ndaj Kosovës. Kështu, shtrirja e autoritetit, integrimi i komunitetit serb në demokracinë tonë e zbeh potencialin shantazhues të Serbisë ndaj elitave tona politike, por edhe ndaj Kosovës që ka pas, kjo është e kompletuar”, thotë Muja.
Sa i përket projektbuxhetit 2025, Muja deklaroi se 30 tetori duhet të jetë data e fundit kur vjen ky projektligj në Kuvend, porse shtoi se, mund të ndodh edhe më herët.
