Aksioni kundër fajdesë në Prizren, tre të arrestuarit jepnin para me kamata mujore prej 25%

Aktuale

Aksioni kundër fajdesë në Prizren, tre të arrestuarit jepnin para me kamata mujore prej 25%

Më: 2 tetor 2024 Në ora: 17:13
Ilustrim

Prokuroria Themelore në Prizren ka dhënë detaje lidhur me operacionin e së mërkurës kundër fajdeve, i cili është zhvilluar në bashkëpunim me Policinë e Kosovës.

Gjatë kontrollit në tri lokacione, janë arrestuar tre persona me inicialet A.Th., I.Th., dhe J.Th., të cilët dyshohen se i kanë dhënë viktimës para me kamata mujore prej 25 për qind, duke e vendosur atë në kushte të paqëndrueshme financiare.

“Të pandehurit e arrestuar, dyshohet se duke shfrytëzuar gjendjen e rënduar financiare të viktimës, të njëjtit i kanë dhënë të holla me kamata mujore prej 25%. I dëmtuari disa herë ka paguar kamata, dhe kur i njëjti nuk ka arritur që t’i pagaj kamatat mujore, të pandehurit i kanë vënë kamata javore, me ç’ rast si rezultat i kamatave të larta, kanë arritur vlera të pa përballueshme për viktimën”, thuhet në njoftimin e Prokurorisë.

Gjatë aksionit janë sekuestruar dy automjete, para të gatshme dhe prova tjera materiale.

Ndërsa të dyshuarit ndodhen nën masën e ndalimit për 48 orë.

Po ashtu, thuhet se prokuroria do të parashtroj kërkesë për caktim të masës së paraburgimit.

comment Për komente lëvizni më poshtë
Sot mund të lexoni Shfletoni kopertinat