Kryetari i Aleancës për Ardhmërinë e Kosovës (AAK), Ramush Haradinaj ka nisur kritika për Qeverinë e Kosovës, duke i akuzuar se e njëjta nuk po i trajton njëjtë qytetarët e saj.
Me rastin e një vizite në Komunën e Gjilanit ku u pritë në shoqatën “HANDIKOS” nga kryetari i saj Fatmir Shurdhani. Haradinaj e vlerësoi si të papranueshme që sipas tij kjo pjesë e ndjeshme e shoqërisë sonë, përballet me neglizhencë nga institucionet.
“Ligji aktual, e po ashtu edhe skemat aktuale pensionale dhe sociale nuk reflektojnë përmirësimin e jetës së qytetarëve e as koston reale të jetesës, veçanërisht atyre që kanë nevojë për dorën e shtetit. Programi ynë parasheh përmirësimin e bazës ligjore për personat me nevoja të veçanta, si dhe rritje 50% në të gjitha skemat pensionale dhe sociale”, shtoi Haradinaj.
“Bashkërisht, pas 9 shkurtit, do të ndërtojmë një Kosovë që kujdeset për të gjithë qytetarët e saj!”, tha ndër tjera i pari i AAK-së.
