Gërvalla “godet” Gjuriqin: Serbia është e interesuar ta shkatërrojë shtetin e Kosovës – SHBA kërkon këtë gjë!

Ministri i Jashtëm serb Marko Gjuriq i ka quajtur gënjeshtra e ofendime ndaj Serbisë, deklarimet e kryediplomates kosovare, Donika Gërvalla.

“Një mesazh i trishtë nga përfaqësuesja e “regjimit Kurti”. Dëgjuam një rrjedhë të pandalshme të gënjeshtrave dhe ofendimeve për Serbinë dhe presidentin tonë. Gjuhë shpifëse që nuk bën asgjë tjetër veç se thellon tensionet ndëretnike dhe kthen rajon në të kaluarën”.

Ai tha se Gërvalla u përgjigj me refuzim ndaj procesit të normalizimit me një gjuhë sipas tij të papranueshme e ofenduese.

“Dua të ritheksoj edhe njëherë, nuk kemi konflikt me popullin shqiptar, kemi problem me një regjim që shtypë komunitetin serb dhe komunitetet tjera jo shumicë”, tha ai derisa theksoi se obsesioni me presidentin Vuçiq tregon një numër gjerash.

“Së pari ai po e udhëheqë Serbinë mirë dhe po e përforcon sigurinë tonë, ekonominë tonë dhe pozicionin tonë ndërkombëtar dhe kjo po i trishton disa. Dhe këtu shfaqet edhe njëherë një mosrespektim ndaj viktimave të konfliktit dhe përdorin gjenocidin në mënyrë të parregullt dhe kjo sidomos ka kuptim kur e kemi parasysh faktin se mbi dy të tretat e serbëve janë zhvendosur me forcë nga atje”, tha ai.

Gjuriq tha se nuk e fsheh faktin që ka takuar Milan Radoiçiqin. 

“Nuk e fsheh faktin që si pjesë e punës time në Kosovë për vite me radhë kam takuar Milan Radoiçiqin po aq sa kam takuar Albin Kurtin dhe Haradinajn dhe Thaçin e të tjerët që janë në burg për krime lufte ndaj komunitetit serb. E dënoj çdo lloj dhune që është ushtruar ndaj cilit do komuniteti në Kosovë, por kam pyetje pse qeveria e Albin Kurtit po ndalë dëshmitë e incidentit, prova që janë kërkuar nga prokuroria e Serbisë përmes e EULEX-it”.

Shefja e diplomacisë kosovare Donika Gërvalla ka hedhur poshtë akuzat e Serbisë, duke thënë se askush nuk i ka përjashtuar serbët nga institucionet e Kosovës.

Ajo tha se serbët kanë nisur të integrohen në institucionet shtetërore të Kosovës dhe shpreson që një gjë e tillë të vazhdojë edhe në të ardhmen.

“Kërcënimet që bëhen ndaj atyre që po bëjnë këtë gjë nga strukturat kriminale, e drejtpërdrejt edhe nga Beogradi, nuk do të arrijnë të ndalin ata që duan të jetojnë në një Kosovë të lirë dhe demokratike”, ka thënë ministrja e Jashtme e Kosovës.

“Serbia ka kërkuar që të braktisen institucionet dhe i ka kërcënuar ata që nuk kanë dashur që të largohen, kështu që Serbia ka bërë të pamundur për ta që të vazhdojnë të jenë në institucionet e Kosovës”, ka thënë Gërvalla në fjalën e saj përmbyllëse në mbledhjen e KS të OKB-së mbi raportin e UNMIK-ut në Nju Jork.

“Kërcënimet e Vuçiq me masat e fundit që i morën, e që janë kritikuar nga BE-ja, nuk do të jenë në gjendje të pengojnë nga krijimi i një të ardhme më të mirë në Kosovë”, ka shtuar Gërvalla. 

Zëvendësambasadori i SHBA-së në Nju Jork Robert Wood përsëriti kërkesën për të rishikuar rolin e UNMIK-ut dhe për të kufizuar diskutimet në Këshillin e Sigurimit në konsultime të mbyllura çdo vit.

Ai gjatë fjalimit të tij në KS të OKB-së në Nju Jork, ka paralajmëruar UNMIK-un që të mbajë një qëndrim më neutral në të ardhmen në raport me situatën në Kosovë.

"Pas një çerek shekulli, UNMIK e ka mbijetuar kryesisht mandatin e tij origjinal dhe SHBA po i bën thirrje Këshillit të Sigurimit të rishikojë këtë mision dhe të fillojë procesin e mbylljes," tha Wood,

Ai shtoi se qëllimi i SHBA-së është njohja e ndërsjellë Kosovë-Serbi, teksa kritikoi ashpër Beogradin zyrtar për faktin se përgjegjësit e sulmit terrorist në Banjska janë ende të lirë.

Zëvendësambasadori i Francës në Nju Jork, Jai Darmadhikari, deklaroi sot se normalizimi i marrëdhënieve Kosovë-Serbi është çelësi i krijimit të stabilitetit më të gjerë evropian.

“Dialogu është inkurajues, por nuk mjafton, në mënyrë që marrëveshja e lidhur të implementohet”, tha diplomati francez gjatë fjalimit në KS të OKB-së mbi raportin e UNMIK-ut për Kosovën.

Ai ka thënë gjithashtu se është e papranueshme që përgjegjësit e sulmit terrorist në Banjskë janë ende të lirë dhe se ata duhet të dalin para drejtësisë.

Përfaqësuesi i Britanisë së Madhe në Nju Jork i ka bërë thirrje Prishtinës zyrtare dhe Beogradit që të tregojnë guxim në përmbushjen e marrëveshjeve të arritura më parë, përfshirë edhe asociacionin dhe vënien para drejtësisë të përgjegjësve për sulmin terrorist në Banjska më 2023.

Në fjalimin e tij në KS të OKB-së, diplomati britanik i bëri thirrje KS të OKB -duhet ta rishikojë rolin e UNMIK-ut, duke deklaruar se 16 vjet pas shpalljes së pavarësisë së Kosovës situata ka ndryshuar.

Ai ka përshëndetur heqjen e kufizimeve ndaj mallrave serbe në Kosovë, teksa shprehu shqetësimin për ngecjen në procesin në dialog.

“Kosova të marrë me kujdes vendimet e saj për të gjithë qytetarët dhe të punojë me partnerët e saj”, tha ai.

Edhe ambasadori i Japonisë në OKB, Yamazaki Kazauki tha se roli i UNMIK-ut duhet të rishikohet nga KS i OKB-së, teksa ka folur edhe mbi ndihmat që Japonia ka ofruar për vendet e Ballkanit Perëndimor, me qëllim të mbështetjes së reformave për anëtarësim në BE.

Ai po ashtu ka kërkuar që të hetohet sulmi terrorist në Banjska më 23 shtator 2023 dhe i ka bërë thirrje Kosovës dhe Serbisë të tregojnë përkushtim ndaj marrëveshjeve të arritura deri më tash në procesin e dialogut në Bruksel. 

Ambasadori slloven në Nju Jork Samuel Zhbogar, gjatë fjalimit të tij në mbledhjen e KS të OKB-së mbi raportin e UNMIK-ut për Kosovën në Nju Jork, ka kërkuar nga Serbia që të ndihmojë në hetimin e sulmit terrorist në Banjska.

Zhbogar kërkoi gjithashtu një aderim më të fortë të Kosovës dhe Serbisë ndaj marrëveshjeve të Brukselit dhe Ohrit, duke dënuar retorikën ndezëse dhe lëvizjet e pakujdesshme.

“Rruga drejt paqes dhe bashkëjetesës nuk mund të bazohet në teorinë e lojës pa fitore apo fitoreve afatshkurtra. Progresi i tillë kërkon përkushtim dhe kompromis”, tha diplomati slloven.

Shefi i diplomacisë serbe Marko Gjuriq ka vazhduar me retorikën e Beogradit zyrtar duke akuzuar Kosovën për kinse “margjinalizim të popullatës serbe” dhe “përkeqësim të situatës në Kosovë”.

Ai gjatë fjalimit në KS të OKB-së me rastin e prezantimit të raportit të UNMIK-ut, ka thënë se “Serbia është e përkushtuar në mënyrë të vendosur ndaj dokumenteve kyçe të OKB-së dhe të ardhmes së begatë të të gjithë qytetarëve të saj.”

Gjuriq tha se “qe nga kthimi i Albin Kurtit në pushtet, ka filluar procesi i margjinalizimit të popullatës serbe” dhe se “veprimet provokuese të policisë së Kosovës krijojnë frikë te popullata serbe”.

Ai shtoi se Kurti nuk planifikon të zbatojë marrëveshjen për formimin e asociacionit.

“Në këtë mënyrë i hidhet hije marrëveshjeve”, tha ai duke shtuar se “situata në Kosovë është përkeqësuar në mënyrë dramatike, duke krijuar një klimë mosbesimi dhe frike.”

Shefja e UNMIK-ut, Caroline Ziadeh, ka prezantuar raportin për situatën në Kosovë, duke thënë se situata në veri “është ende e brishtë,” teksa kërkoi një hetim gjithëpërfshirës për sulmin terrorist në Banjska më 23 shtator 2023, duke e quajtur atë "të papranueshme" dhe një "incident të rëndë sigurie".

Ziadeh paralajmëroi “rrezikun” që paraqet paralajmërimi për hapjen e urës në Mitrovicë për vetura, si dhe për një sërë veprimesh të policisë së Kosovës, të cilat po hetohen për përdorim të tepruar të forcës.

“Veprimet e autoriteteve të Kosovës në veri reduktuan mundësinë e komuniteteve pakicë, para së gjithash serbëve, për të pasur qasje në nevojat themelore, duke përfshirë shëndetin dhe arsimin,” tha ajo.

Kritika ndaj perëndimit se po mbyllin sytë ndaj qeverive shqiptare, pati sot Rusia përmës përfaqësuesit të saj në OKB.

Ambasadori rus, Vasily Nebenzya, madje pati pretendime të rreme kundër shtetit të Kosovës, duke kërkuar që Prishtina të obligohet për themelim të Asociacionit.

”Menjëherë obligojeni Prishtinën për Asociacionin”.

”Më 2024 ishin 93 sulme etnike ndaj serbëve”.

”Pasi Vetëvendosja erdhi në pushtet u rritën këto sulme, Albin Kurti u shpalli luftë gjithçkaje serbe. Marrëveshja e Brukselit me qëllim e harruar, Asociacioni”.

”Themelimi i saj s’është veç dëshirë, por obligim, që Prishtina e saboton me dekada”.

Gjatë adresimit të saj në mbledhjen e Këshillit të Sigurimit të OKB-së për Kosovën kryediplomatja kosovare Donika Gërvalla ka thënë se sulmi terrorist i 24 shtatorit në Banjskë, ku u vra rreshteri Afrim Bunjaku, ishte test për perëndimin, test për ato që pritet të vijnë.

“Sulmi i Serbisë më 24 shtator të vitit të kaluar është planifikuar si invazion ushtarak dhe aneksim i një vendi paqësor me mijëra trupa të NATO-s. Për ta bërë të qartë këtë, ky ishte sulmi i parë i aleancës së Putinit ndaj një vendi me prezencë të NATO-s, është  test për perëndimin, test për ato që pritet të vijnë”, tha gjatë fjalës së saj shefja e diplomacisë kosovare.

Tutje tha ajo se Vuçiqi e Putini nuk janë dorëzuar.

“Prandaj na duhet zmbrapsja e tyre pikë së pari e pastaj dialogu. Vetëm me zmbrapsje të tillë mund të kemi paqe e siguri, sepse kur Vuçiqi e Gjuriqi e të tjerë në Serbi thonë dialog, nuk e kanë këtë në mendje. Nuk kanë ndonjë interesim në dialog, thjesht kanë interes të shkatërrojnë Republikën e pavarur të Kosovës dhe atë me forcë. Askush nuk mund të mashtrohet, kjo është dëshmuar tashmë dhe do ta provojnë prapë. Kështu, Kosova është falënderuese për NATO-n për ngritjen e numrit të trupave për ta zmbrapsur Serbinë nga agresioni i radhës. Ministri i mbrojtjes i Serbisë që përgatiti sulmin paramilitar për më shumë se një vit, mori ngritje në detyrë nga Vuçiqi, tani ai është kryeministër i ri i Serbisë. Presidentja e KE-së refuzoi ta takonte për shkak të lidhjeve të tij aktive me Rusinë”, shtoi Gërvalla.

Ajo tha se duhet të flasin për rrezikun, e që disa sipas saj, kanë frikë ta përmendin, për luftën dhe si ta parandalojnë një luftë të ardhshme në Evropë.

“E nderuara presidente duhet të flasim për rrezikun që disa kanë frikë ta përmendin e duhet të flasim edhe për luftën, se si ta parandalojmë një luftë të ardhshme në Evropë, për të cilën disa thonë Putini mund ta ketë Ballkanin shënjestrën e ardhshme. Dora e zgjatur e Putinit, Vuçiqi vazhdon të mbrojë terroristët që udhëhoqën sulmin paramilitar të Serbisë kundër Republikës së Kosovës vitin e kaluar. Lideri i tyre, Radoiçiqi një prej njerëzve më brutal e më të pasur në Serbi, jo i pasur duke trashëguar nga prindërit e tij pasuri, por me anë të krimit, është angazhuar në zhvatje e vrasje të qytetarëve serb të Kosovës”, shtoi Gërvalla, derisa bëri të qartë kërkesën që ai të ekstradohet në Kosovë.

“Kosova kërkon ekstradimin e tij, ai është përgjegjës për vrasjen e zyrtarit tonë policor, heroit tonë kombëtar, toger, Afrim Bunjaku. Këtë Gjuriqi e di shumë mirë nga vitet e tij të shumta si dorë e djathtë e Vuçiqit në luftën kundër Kosovës gjatë viteve 2013-2020. Gjuriq dhe Radoiçiq vrasësi ishin aleat në shtypjen e qytetarëve serb të ndershëm që dëshironin vetëm jetë normale. Gjuriqi ishte kryesori kur Radoiçiqi u angazhua në vrasjen e politikanit më të shquar serb Oliver Ivanoviq që u vra para derës së tij. Dhe Gjuriqi takohej me të prapë, tash së voni duke pirë kafe në Beograd me të njëjtin kriminel e terrorist. E kjo tregon llojin e karaktereve me të cilët ballafaqohemi. Kush këtu është në rregull që të pihet kafe me një vrasës brutal”, tha Gërvalla derisa shpalosi edhe fotografinë e një takimi mes Gjuriqit e Radoiçiqit.

Gërvalla e ka quajtur secilën fjali të Gjuriqit në këtë seancë si gënjeshtër.

“Çfarë dëgjuam këtu sot janë aq shumë gënjeshtra sa që është e pamundur të demantojmë secilën prej tyre në këtë kohë kaq të shkurtër që jemi këtu. Shumica prej jush keni ambasada në Republikën e Kosovës që ju konfirmojnë që asnjë nga këto deklarata të Gjuriqit nuk janë të vërteta. Të jemi të qartë, të mos e besojmë asnjë gënjeshtër të tillë të çmendur që qytetarët e Kosovës nuk paskan qasje në shëndetësi, llogari bankare apo shërbime lokale. Realiteti është i qartë. Kemi shumë qytetar serb në komunat veriore të Republikës së Kosovës që na thonë me kënaqësi që përfundimisht kanë arritur të marrin frymë lirshëm pa frikë e që arrijnë të regjistrojnë fëmijët në komunë pas shumë vitesh”, tha ajo.

Gërvalla tha se në pjesën veriore të Kosovës është krijuar diçka e re, diçka e çmuar që sipas saj është normaliteti, lufta ndaj krimit, sundimi i ligjit në vend të sundimit të bandave kriminale të sponsorizuara nga Beogradi.

“Shërbime normale komunale në vend të keqpërdorimit të fondeve publike. Kemi krijuar atë që vendet tuaja demokratike me përvojë i ofrojnë për një kohë shumë të gjatë qytetarëve tuaj. Shërbim publik të përgjegjshëm e transparent. Do të vazhdojmë të mbrojmë qytetarët tanë e të zgjerojmë spektrin e shërbimeve që ata meritojnë të cilët nuk i kanë parë për aq shumë vite. Jo vetëm populli në  Kosovë që është i ngopur me gënjeshtra të tilla, ka një arsye pse Vuçiqi po humb ndikimin mbi qytetarët  serbët të Kosovës. Nëse ata nuk e besojnë propagandën e tij, askush nuk duhet ta besoj”.