“Mbylle gojën”, “Ti ke qit gaz lotsjellës” - Përplasje të ashpra në Kuvend

Deputeti i Kuvendit të Kosovës, Haki Abazi, ka kritikuar Qeverinë duke thënë se vendi kurrë nuk ka qenë më i izoluar se tash.

Ai në fjalimin e tij bëri disa kritika në drejtim të pushtetit.

“Vendi kurrë nuk ka qenë më i izoluar. Jemi në fundin e fundit, jemi 20 vite mbrapa edhe me lirinë e lëvizjes, nuk mundeni me u kritiku me një proces që është nisur para 15 viteve.  Mjaft me gënjeshtra, jemi nën sanksione…  Asnjë minister nuk e keni që vjen me raportu. jeni më keq se qeveritë tjera. Lërini debatet toksike”, tha ai.

Ndryshe, seanca e Kuvendit të Kosovës edhe kësaj here ka nisur rreth një orë me vonesë.

Në nisje të kësaj seance pati disa mospajtime mes partive opozitare dhe kryeparlamentarit Glauk Konjufca rreth kuorumit për fillimin e seancës.

Në procesin e votimit për prezencë votuan vetëm 58 deputetë nga mazhoranca, kurse deputetët e opozitës edhe pse të pranishëm nuk votuan për prezencë.

Deputetja e PDK-së, Ariana Musliu-Shoshi, ka kërkuar nga Prokuroria që të hetojë rastin me humbjen e pasaportave.

Ajo në Kuvend ka thënë se skandale në Ministrinë e Punëve të Jashtme nuk kanë të ndaluar, teksa ka përmendur edhe kontratat njëburimore në këtë ministri.

“Aferat, dhe skandalet në Ministrinë e Punëve të Jashtme dhe të Diasporës të Kosovës s’kanë të ndalur. Nga data 2 tetor 2024 kanë humbur 406 pasaporta, 165 letërnjoftime dhe 4 vendime për shtetësi të mërgimtarëve në postën diplomatike të Republikës së Kosovës. Keto vonesa kishin vetem nje qellim, aplikimin e kontratave njëburimore nga kjo Ministre e papergjegjshme. Për të qene e qarte, kontrata një burimore jane hajni.”

“Humbja e dokumenteve përsonale, nuk eshte thjeshte problem i pajisjes me dokument identifikimi, POR rrezikon keqpërdorimin e identitetit të bashkëatdhetarëve tanë gjë që nuk guxon të ndodhë në asnjë mënyrë dhe eshte e denueshme me ligj.” – ka thënë Musliu-Shoshi.

Tutje, ajo ka këkuar hetim nga Prokuroria.

“Partia Demokratike me shqetesim ka adresuar këtë problem dhe ka kërkuar llogaridhënje nga Ministria e Punëve të Jashtme dhe ka bëre thirrje urgjente që organet e rendit dhe drejtësisë të merren me këtë cështje, thirrje kjo qe e perserisim edhe sot. Mësohet se MPJD, pas ketyre reagimeve, ka adresuar kërkesë për shpallje të pavlefshme të rreth 500 dokumenteve për mërgatën tanë dhe më pas u kërkuar që kjo kërkesë të anulohet. Sot, me urgjencë kërojmë llogaridhënje nga kjo qeveri. Pse dhe si u zhdukën dokumentet personale të bashkëatdhetareve tane, ku janë këto dokumente, PSE eshte anuluar kërkesa për shpallejen të pavlefshme të këtyre dokumenteve? Duke ditur rrezikun per dëmin qe mund te iu shkaktohet mergimtareve tane me vjedhje te identitetit, ne me ngum ftojmë prokurorinë që të hetoj kete rast!” – ka thënë ajo.

Deputeti i AAK-së, Pal Lekaj, ka hedhur kritika në drejtim të ministrit të Infrastrukturës, Liburn Aliu, për “gjendjen e rëndë në rrugët e Kosovës”.

Lekaj ka thënë se rrugët janë bërë rrugë të vdekjes.

“Më shqetësuese është sot se rrugët e Kosovës janë bërë rrugë të vdekjes dhe ta marrim rrugën për Gjilan. Nuk di se çka thotë ministri Liburn Aliu e zëvendësministri Durmishi dhe si mund të dalin e të krenohen me punën e tyre kur rrugët marrin jetëra. Nuk ka sinjalizim dhe është mjerim i Ministrisë përkatëse.

Rruga Dollc-Gjakovë, që shtatë deputetë që vijnë nga Gjakova dhe është turp i kësaj Ministrie se si i ka lënë qytetarët e Gjakovës në ketë gjendje. Besoni se pas një muaji pasi e kanë bërë shtresën e parë, hajdeni dhe shkojmë ta këqyrim se në çfarë gjendje të mjerueshme e kanë lënë. Besoni se më kish ardhë turp me qenë ministër e me ndejt para deputetëve e me i lënë rrugët në atë gjendje”, tha Lekaj.

Nënkryetarja e Kuvendit, Saranda e Bogujevci, ka pasur një përplasje me deputetin e pavarur, Haki Abazi për “mosvazhdim të fjalës”.

Megjithëse Bogujevci tha se ia ka vazhduar fjalën deputetit Abazi, ai e mohoi këtë.

Madje ky i fundit iu drejtua njërit prej deputetëve të pushtetit me fjalët “mbylle gojën”.

“Pse çdo herë duhesh me kriju skena të tilla. Ta vazhdova fjalën”, tha Bogujevci, teksa Abazi këmbngulte për të kundërtën.

“Ti ke qit gaz lotsjellës”, iu përgjigj Abazi.

Driton Selmanaj, deputet i LDK-së, ka marrë fjalën në seancën plenare të Kuvendit të Kosovës.

Në fjalën e tij, Selmanaj ka numëruar gjetjet e Raportit të Progresit të BE-së për Kosovën.

Sipas Selmanajt, Qeveria Kurti ka zgjedhur rrugën e izolimit dhe autoritarizmit.

Megjithatë, Selmanaj vlerësoi se kjo logjikë qeverisëse do të marrë fund më 9 shkurt, data kur do të mbahen zgjedhjet e përgjithshme parlamentare.

“Të vetmen rrugë që e ka zgjedhur kjo qeveri është izolimi, autoritarizmi dhe përpjekja për fundin e demokracisë, por kjo normalisht që nuk do të lejohet. Jemi të bindur që kjo nuk do të ndodh dhe kjo logjikë qeverisëse e tillë çfarë ka qenë për katër vite do të merr fund me 9 shkurt”, tha Selmanaj.

Deputetja e PDK-së, Floretë Zejnullahu e ka ngritur në Kuvend çështjen e mungesës së ujit të pijshëm në një pjesë të kryeqytetit si pasojë e ndotjes së liqenit të Badocit me sasi të madhe të manganit.

Ajo tha në seancën e sotme se “qindra mijëra qytetarë janë detyruar të blejnë ujë çdo ditë”.

“Sot jam këtu për të folur për një krizë të madhe që ka rënduar e po rëndon mbi gjysmën e Prishtinës. Tashmë prej tri javësh, kryeqyteti po përballet me mungesë të ujit të pijshëm për shkak të pranisë së manganit në ujin e liqenit të Badocit”, tha Zejnullahu.

Ajo tha se “këta qytetarë po e ndjejnë rëndesën e një keqqeverisjeje”.

“Kjo situatë alarmante është pasojë e një neglizhence të qëllimshme, një paaftësie e cila është bërë normë në këtë qeveri që po luan me jetën dhe shëndetin e qytetarëve të saj”, tha ajo.

Zejnullahu tha se Qeveria nuk ka marrë asnjë masë për zgjidhjen e kësaj krize.

“Në vend që qeveria me vepru, me marrë masa parandaluese dhe sanuese të këtij problemi, ajo vazhdon me qëndru e heshtur dhe pasive”, tha ajo.

Deputetja tha se Qeveria s’ndërmori “asnjë hap të vetëm konkret për pastrimin e liqenit të Badocit” apo “për krijimin e alternativave të tjera për furnizim me ujë të pijshëm për qytetarët e Prishtinës”.

“Sipas ligjit për ujërat, kryeministri është kryetar i këshillit ndërministror për ujëra, dhe si rrjedhojë, ai është i detyruar që të vijë në Kuvend e të raportojë për këtë situatë”, tha ajo.

Lëvizja Vetëvendosje vlerëson se raporti për vendin evidenton përparimin e Kosovës në fusha të rëndësishme që përfshijnë reformat institucionet, sundimin e ligjit, zhvillimin ekonomik dhe integrimin rajonal.

Deputetja e Lëvizjes Vetëvendosje, Fjolla Ujkani u shpreh se Kosova ka shënuar progres në përmbushjen e standardeve ekonomike dhe të Bashkimit Evropian.

Këto komente Ujkani i bëri në seancën plenare të Kuvendit të Kosovës.

Ujkani: Kemi progres në përmbushjen e standardeve të BE-së

“Gjatë tre viteve të fundit raportet e Progresit Evropian kanë theksuar arritjet e rëndësishme legjislative të Kosovës në kriteret politike dhe progresin e saj në përmbushjen e standardeve ekonomike dhe të BE-së. Në agjendën e BE-së qeveria jonë është vlerësuar pozitivisht në zbatimin e Agjendës për Reforma Evropiane ERA2 duke arritur mbi 70% zbatueshmëri. Gjithashtu programi kombëtar për integrimin evropian i fokusuar në zbatimin e marrëveshjes së stabilizim asocimit ka pasur një normë vjetore të zbatimit që ka kalon 60%”, theksoi ajo.

Deputetja nga radhët e LVV-së, Fjolla Ujkani para deputetëve të Kuvendit të Kosovës u shpreh se raporti për vendin tregon për progres në luftën kundër korrupsionit, reformat në administratë publike, kulturë, arsim e punësim.

“Ky raport evidenton përparimin e Kosovës në fusha të rëndësishme që përfshijnë reformat institucionet, sundimin e ligjit, zhvillimin ekonomik dhe integrimin rajonal... nuk ka fusha të vlerësuara me regres si në vitet e kaluara. Në shumë fusha ne kemi kaluar një hap më lartë në shkallët e progresit siç janë lufta kundër korrupsionit, reforma e administratës publike, politikat ekonomike dhe monetare funksionimi i ekonomisë së tregut, arsimi dhe kultura, politika sociale dhe punësimi”, shtoi ajo.

Deputetja, Ujkani theksoi se heqja e masave ndëshkuese të vendosura nga BE-ja karshi Kosovës do të ringjallte dhe përshpejtonte reformat.

Ujkani: Heqja e masave të BE-së të përshpejtonte më tej reformat tona

“Heqja e masave ndëshkuese të vendosura nga BE do të ringjallte motivimin tonë dhe do të përshpejtonte më tej reformat tona. Përkushtimi i Kosovës do të forcohet edhe më shumë pasi të arrij statusin e vendit kandidat duke e bërë rrugën tonë drejtë BE-së më të qartë dhe më të prekshme”, tha ajo.

Deputetja e Partisë Demokratike të Kosovës, Ariana Musliu-Shoshi, ka thënë se dhjetë pjesëtarë të Forcës së Sigurisë së Kosovës kanë dhënë dorëheqje në tetor.

“Dhjetë pjesëtarë të Forcës së Sigurisë së Kosovës, kanë dhënë dorëheqje nga FSK-ja vetëm në muajin tetor.

Pra merreni mend, dhjetë pjesëtarë të FSK-së.

Ja ku e keni sjellë vendin”, tha ajo në seancën e Kuvendit.

Seanca e Kuvendit të Kosovës ka nisur një orë me vonesë.

Në seancë tashmë ka ardhur edhe kryeparlamentari, Glauk Konjufca.

Mirëpo, edhe me pjesëmarrjen e tij në këtë seancë, pozita prapë nuk mund t’i arrijë 61 vota për kourum.

Tri partitë opozitare nuk kanë pranuar që të fillojë seanca pa u hedhur në votim pjesëmarrja e tyre, me arsyetimin se çdo seancë kërkohet të fillojë me votim.

Shefi i deputetëve të PDK-së, Abelard Tahiri, tha se deri më tani ka ndodhur një praktikë e tillë.

“Fillimin e seancës duhet ta konfirmojmë me votim dhe nuk duhet të fillojë ndryshe. Deri sot kuorumin e kemi bërë me votim”, tha Tahiri.

Mirëpo kreu i Kuvendit, Glauk Konjufca tha se seanca duhet të vazhdojë edhe pa e konfirmuar kuorumin.