Kreu i AKR-së Behgjet Pacolli ka reaguar për pajisjen e përgjimit që u gjet në veturën e gazetarit Vehbi Kajtazi, i cili tash e sa kohë ka ngritur alarmin se po përndiqet nga AKI.
Sipas Pacollit ky përzhakallëzim i situatës ka synim të frikësoj median dhe ta shtypë transparencën.
E plotë:
Zbulimi i një pajisjeje përgjimi në veturën e gazetarit Vehbi Kajtazi është një kërcënim i rëndë për lirinë e medias dhe nënvizon rreziqet me të cilat përballen gazetarët kur ekspozojnë korrupsionin dhe krimin politik sot në Kosovë.
Ky përshkallëzim, synon të frikësojë median dhe të shtypë transparencën.
Veprime të tilla gërryejnë demokracinë.
Raporti i fundit i progresit i BE-së paralajmëron për tendencen për kontroll nga ana e qeverisë së Kosovës mbi median, duke rrezikuar lirinë e shtypit—një gur themeli i demokracisë.
Bej thirrje për një hetim të pavarur dhe të thelluar mbi këtë përshkallëzim alarmues të frikësimit të gazetarëve dhe nevojën urgjente për mbrojtjen e tyre personale dhe profesionale.
Shprehi solidaritetin tim ndaj Gazetarit Vehbi Kajtazi dhe gazetarët në Kosovë, duke i bërë thirrje qeverisë të sigurojë mbrojtjen dhe të drejtën e tyre për të raportuar pa kërcenime dhe të lirë dhe të mos hesht ndaj incidenteve që po ndodhin ndaj mediave.
Një media e lirë është thelbësore për të ardhmen demokratike të Kosovës.
