Magbule Shkodra, njohëse e zhvillimeve politike, tha se transicioni i pushteteve në Shtëpinë ë Bardhë pritet të jetë paqësor, ndërkaq sa i përket qasja e Administratës Trump karshi Kosovës e rajonit ajo tha se kjo mbetet të shihet se kush do të jenë në pozitat udhëheqëse të kabinetit të Trump-it.
Në magazinën informative, “Lajmet e fundit”, në RTK, Shkodra tha se pritet të jetë një kabinet shumë më profesional.
Sipas Shkodrës, Trump do të kërkojë që të jetësojë marrëveshjen e arritur gjatë mandatit të tij të mëparshëm në Shtëpinë e Bardhë ndërmjet Kosovës e Serbisë.
“Besoj se marrëveshjen që është nënshkruar gjatë mandatit të kaluar të zotit Trump, ai do ta jetësojë këtë”, tha Shkodra, derisa shtoi se marrëveshjet e nënshkruara tashmë nga Kosova e Serbia të respektohen.
Ndërsa lidhur me politikën e jashtme amerikane, sipas Shkodrës, Trump ka premtuar se politika e tij do të jetë paqësore dhe që do t’i japë fund luftërave në botë, qoftë luftës Rusi-Ukrainë, apo luftës në Gaza.
Sa i përket Ballkanit Perëndimor, Shkodra tha se politika amerikane nuk pritet të ndryshojë rrënjësisht, derisa shtoi se prioritet për SHBA-në në këtë rajon është siguria.
