Trusti Pensional i Kosovës ka njoftuar se përkohësisht janë jashtë funksionit uebfaqja dhe shërbimi online eTrusti.
Kjo për shkak të një problemi teknik të shkaktuar nga shkëputja e kabllove që furnizojnë zyrën me internet.
Kjo ndërprerje është pasojë e punimeve që po zhvillohen nga kontraktorët pranë Teatrit Kombëtar.
Në një deklaratë për publikun, Trusti bëri të ditur se është në bashkëpunim të ngushtë me Telekomin e Kosovës për të rikthyer funksionimin e shërbimeve sa më shpejt të jetë e mundur.
Institucioni falënderon paraprakisht kontribuuesit dhe të gjitha palët për mirëkuptimin dhe premton përkushtim për zgjidhjen e shpejtë të situatës.
Për çdo informacion të mëtejshëm, qytetarët mund të kontaktojnë Trustin përmes kanaleve të tjera të komunikimit.
