Shqyrtimi i buxhetit, Osmani u kërkon deputetëve mjete shtesë për FSK-në
Gjatë fjalimit vjetor para deputetëve, presidentja Vjosa Osmani u ka bërë thirrje deputetëve që të paraqesin amendamente dhe të propozohet që buxhetit për FSK-në t’i shtohet shuma e duhur “që ushtarakët tanë të kenë shtesat e rrezikshmërisë, ato për jashtë orarit të punës dhe mëditjet për trajnimet mbi një muaj”. Kuvendi i Kosovës është duke shqyrtuar në lexim të dytë buxhetin për vitin 2025.
Osmani: Armatimi ka kuptim kur prapa armës qëndron ushtaraku i motivuar e i mbështetur
"Mirëqenia ekonomike e sociale e ushtarakëve tanë, motivimi i tyre, mbështetja e avancimit të tyre profesional duhet po ashtu të shndërrohen në prioritet. Armatimi ka kuptim kur prapa armës qëndron ushtaraku i motivuar e i mbështetur. Në këtë frymë angazhimi ynë i çdo ditshëm duhet të jetë në drejtim të arritjes së këtij qëllimi. Të nderuar deputetë, hapin e parë mund ta bëni qysh sot. Praktika e Kuvendit ju lejon nëpërmjet procedurës së shmangies të paraqitni amendamente edhe në seancë, shfrytëzojeni këtë mundësi që të propozohet buxhetit të FSK-së t’i shtohet shuma e duhur në mënyrë që ushtarakët tanë të kenë shtesa të rrezikshmërisë, ato për jashtë orarit të punës si dhe mëditje për trajnime mbi një muaj. Ky do të ishte kontribut i jashtëzakonshëm në fuqizimi ne ushtrisë sonë, dje një laj i mirë në fund vit për secilit që sot i shërben atdheut. Kjo duhet të bëjë në momentin e parë te rishikimit të buxhetit", tha ajo.
Presidentja e Republikës së Kosovës, Vjosa Osmani në adresimin vjetor në Kuvendin e Kosovës ka theksuar se rruga deri te shteti që e gëzojmë sot nuk ka qenë fare e lehtë.
Osmani: Rruga deri te shteti që e gëzojmë sot nuk ka qenë fare e lehtë
“Populli ynë ka humbur edhe më të shtrenjtën, duke përfshirë edhe fëmijët në djep, në mënyrë që sot të frymojmë lirinë. Bashkëdyzimi i vizionit të binomit Ibrahim Rugova – Adem Jashari, nëpërmjet luftës çlirimtare të UÇK-së, në njërën anë dhe ndërtimit të shtetit duke fuqizuar aleancat nga ana tjetër, bëri që themelet e shtetit tonë të jenë të forta, shumë të forta, aq të forta sa që nuk ka forcë dhe nuk ka sfidë që mund t’i rrënojë ato”, tha ajo.
Projekt buxheti 2025 kap vlerën 3.6 miliiardë euro apo 9 për qind më i madh se në vitin 2024.
Tahiri kërkon sqarim për mostrajtimin e organizatave buxhetore
Shefi i grupit parlamentar i AAK-së, Besnik Tahiri ka thënë se në bazë të informacioneve që ka marrë nga deputeti Palë Lekaj i cili është në Komisionin për Buxhet dhe Ekonomi, tregojnë se ka shkelje të plasimit të buxhetit në seancën e cila ka nisur sot në Kuvend.
Ai kërkoi sqarim në lidhje me kërkesat të cilat sipas tij nuk janë trajtuar nga organizatat buxhetore.
“Kjo lidhet me mostrajtimin dhe mos-sjelljen në Kuvend të kërkesave buxhetore që vijnë prej organizatave buxhetore.
Asnjë kërkesë e asnjë organizate buxhetore, op flas për kërkesa që vijnë nga komuna që udhëhiqen nga AAK-ja, kërkesa nga komuna e Rahovecit që nuk janë trajtuar e që janë gjashtë, tre janë nga Gjakova dhe një kërkesë që vjen nga Deçani”, tha Tahiri.
Tahiri nga PDK-ja: Ky është buxhet i kontaminuar
Shefi i grupit Parlamentar të PDK-së, Abelard Tahiri, ka thënë se ky buxhet është buxhet i kontaminuar.
Sipas tij votimi i këtij projekt buxheti do të thotë mbështetje e skemave kriminale.
“Kërkoj që ky buxhet të mos vihet fare në lexim të dytë. Kanë dal një mori ngjarjesh kriminale. Votimi i këtij projekt buxheti do të thotë mbështetje e këtyre skemave kriminale. Ky është buxhet i kontaminuar. Duhet t’i nënshtrohet një diskutimi të thellë dhe jo në procedura të përshpejtuara. Këta njërz që kanë marrë skemat kriminale, 30 për qind nga subvencionet dhe grantet do t’i marrin edhe vitin tjetër. Kërkoj që ky projekt të kthehet prapa”, ka thënë ai.
Gashi akuzon mazhorancën për shkelje kushtetuese
Shefi i Grupit Parlamentar i LDK-së, Arben Gashi, tha se me projektligjin për buxhetin e vitit 2025, mazhornaca po tenton që të bëjnë ndryshime në ligjin për paga dhe ligjin për tatimin në prona të pa luajtshme.
Me këtë rast, ai ka thënë se qeveria është duke bërë shkelje Kushtetuese.
“Ka ndodhur një shkelje procedurale që në vetvete përmban shkelje Kushtetuese. Me ligjin për ndarje buxhetore tentohet që të ndryshohet ligji për pagat për zyrtarët publik dhe ligji për tatimin në prona të pa luajtshme. Këto përbëjnë shkelje Kushtetuese. Këto janë shkelje të rënda dhe sidomos heqje e mundësisë që deputetët të flasin për amandamentin. I bëjmë thirrje presidentes që të garantoj që ligji të kthehet në Kuvend. Këta kanë mbërri që me një ligj tri herë me shkel Kushtetutën”, ka thënë ai.
Kadrijaj vendos një pankartë në Kuvend: “Fitore Pacolli 200 mijë euro, Gratë e Krushës 0 euro”
Deputetja e AAK-së Time Kadrijaj, në seancën ku po diskutohet në shqyrtim të dytë buxheti për vitin 2025, ka vendosur një pankartë me mbishkrimin “Fitore Pacolli 200 mijë euro, Gratë e Krushës 0 euro”.
Kjo pas raportimeve në media se familajrët e deputetes së VV-së kanë përfituar grante bujqësore.
Kuvendi sot shqyrton buxhetin e Kosovës për vitin 2025
Sot deputetët e Kuvendit të Kosovës do t’i kthehen sallës plenare. Aty do të diskutohet vetëm një pikë e rendit të ditës që është shqyrtimi i dytë i Projektligjit mbi ndarjet buxhetore për Buxhetin e Republikës së Kosovës për vitin 2025. Seanca fillon në ora 10:00.
Ndryshe buxheti për vitin 2025 do të jetë 3.6 miliardë euro, apo rreth 300 milionë euro më i lartë se buxheti i vitit 2024.
Kuvendi Kosovës ditë më parë kishte votuar në parim projektligjin për buxhetin e Kosovës për vitin 2025.
Pro buxhetit kishin votuar 59 deputetë, ndërsa 2 deputetë kishin abstenuar.
Buxheti ka kaluar nëpër disa komisione parlamentare.
