Në Ditën Ndërkombëtare për Zhdukjen e Skllavërisë, Ambasada Amerikane në Prishtinë ka theksuar përkushtimin e Shteteve të Bashkuara për të adresuar problemin global të trafikimit të qenieve njerëzore.
Në një deklaratë të bërë publike, Ambasada theksoi se trafikimi njerëzor prek në mënyrë disproporcionale grupet e margjinalizuara dhe ato me më pak mundësi, përfshirë gratë dhe vajzat.
“SHBA vazhdon përpjekjet e saj përmes katër shtyllave kryesore: parandalimi, mbrojtja, ndjekja penale dhe partneriteti,” thuhet në deklaratë.
Ky mesazh është pjesë e nismës globale për 16 Ditët e Aktivizmit kundër dhunës me bazë gjinore, një fushatë ndërkombëtare që synon ngritjen e vetëdijes për çështjet si trafikimi, skllavëria moderne dhe shfrytëzimi i qenieve njerëzore.
