Këshilli Drejtues i PDK-së të dielën ka miratuar një deklaratë politike me pesë pika.
Përmes kësaj deklarate, PDK-ja shpreh shqetësimet e saj lidhur me zhvillimet në Dhomat e Specializuara në Hagë.
Me kandidatin, programin dhe ekipin më të mirë të kandidatëve për deputetë, PDK-ja thotë se angazhohet për fitore më 9 shkurt.
Sipas tyre, kjo parti qëndron e bashkuar në misionin e saj për të ndërtuar një Kosovë më të zhvilluar, më të sigurt dhe më të mirë, thuhet në deklaratë.
Bazuar në zhvillimet e fundit në vend, Këshilli Drejtues i Partisë Demokratike të Kosovës miraton deklaratën e mëposhtme:
1.Shqetësimet për Hagën:
PDK shpreh shqetësimet e saj lidhur me zhvillimet në Dhomat e Specializuara në Hagë.
Ne kërkojmë drejtësi dhe paanshmëri ndaj procedurave gjyqësore, dhe një qasje me standarde evropiane, e cila garanton të drejtat themelore të secilit individ.
Çdo përpjekje për t’i dhënë tjetër kah së vërtetës së luftës çlirimtare të popullit tonë, rrezikon të minojë jo vetëm legjitimitetin e drejtësisë, por edhe të cenojë trashëgiminë e sakrificës së shenjtë për liri.
2. Drejtësi për Kosovën:
PDK i ka ndjekur me vëmendje zhvillimet e fundit në vend.
Kërkojmë hetim të plotë, përgjegjësi dhe dënim të kriminelëve të cilët kryen sulmin terrorist ndaj infrastrukturës kritike dhe institucioneve në Kosovë.
PDK i bën thirrje komunitetit ndërkombëtar që të reagoj me vendosmëri kundër veprimeve armiqësore të Serbisë ndaj Kosovës dhe në dëm të stabilitetit rajonal.
3. Siguri kombëtare dhe integrim:
Për Partinë Demokratike të Kosovës, fuqizimi i sigurisë kombëtare të Kosovës mbetet prioritet.
PDK thekson nevojën për të mbrojtur sovranitetin shtetëror dhe për të fuqizuar bashkëpunimin me aleatët tanë strategjikë, veçanërisht Shtetet e Bashkuara të Amerikës dhe vendet e BE-së.
Krahas ofrimit të sigurisë për vendin dhe qytetarët, Kosova duhet të intensifikojë koordinimin me aleatët e saj në rrugën e integrimit euro-atlantik.
Ky është i vetmi drejtim dhe qëllim politik i Kosovës.
4. Kosova mundet ma mirë:
Gjatë katër viteve të fundit, Kosova ka pasur një qeveri të cilën e definojnë stagnimi, mundësitë e humbura dhe dështimi për të përmbushur reformat e rëndësishme.
Mungesa e përparimit në zhvillim ekonomik, shëndetësi, arsim, diplomaci dhe në fusha të tjera, i ka lënë qytetarët tanë të frustruar dhe vendin tonë pa e përmbushur potencialin e plotë.
Njëjtë sikur qytetarët e Kosovës, ne besojmë se Kosova mundet ma mirë. Me lidership vizionar, qeverisje profesionale dhe një program të qartë për zhvillim, Kosova mund të përballoj me sukses sfidat e sotme dhe të nisë ndërtimin e një të ardhmeje më të mirë për të gjithë qytetarët e saj.
Ky është misioni i PDK-së.
5. Mobilizimi zgjedhor për fitore:
PDK është plotësisht e mobilizuar për zgjedhjet e përgjithshme të 9 shkurtit.
Partia Demokratike e Kosovës është e inkurajuar nga mbështetja e madhe e qytetarëve, brenda dhe jashtë vendit, për kandidatin tonë për kryeministër, Bedri Hamzën.
Me kandidatin, programin dhe ekipin më të mirë të kandidatëve për deputetë, PDK-ja angazhohet për fitore më 9 shkurt. PDK qëndron e bashkuar në misionin e saj për të ndërtuar një Kosovë më të zhvilluar, më të sigurt dhe më të mirë.
