Deputeti i Lidhjes Demokratike të Kosovës, Besian Mustafa kritikon qeverinë aktuale për siç thekson ai dështimet në fushën e ekonomisë dhe menaxhimit të investimeve vendore e të huaja. Ai ka theksuar se 99 për qind e premtimeve të Qeverisë Kurti nuk janë realizuar, duke e cilësuar këtë periudhë si një "dështim total". Madje, ai shprehet i kënaqur që nuk janë funksionalizuar Banka Zhvillimore dhe Fondi Sovran.
Mustafa theksoi se qeveria aktuale nga subjekti politik Vetëvendosje ka dështuar të krijojë mundësi për zhvillimin e sektorit privat, duke e futur siç tha ai Kosovën në një periudhë izolimi ekonomik me masa të vendosura nga Bashkimi Evropian.
Kandidati për deputet nga LDK-ja, Mustafa shton se me fitoren e LDK-së në zgjedhjet e 9 shkurtit, Qeveria e ardhshme do të mbështesë rritjen afatgjate ekonomike dhe përmirësimin e kushteve për bizneset e Kosovës.
Për sa i përket investimeve të huaja, kandidati për deputet nga LDK, Mustafa ka theksuar se nuk ka pasur projekte investive të rëndësishme nga kompani serioze ndërkombëtare gjatë qeverisjes aktuale.
Në një intervistë për KosovaPress, ai thotë se ka zero investime të mëdha nga investitor të huaj.
Mustafa: Jo gjysma premtimeve, 99 për qind e premtimeve të kësaj qeverie nuk janë realizuar
“Jo gjysma e premtimeve, 99 për qind e premtimeve të kësaj qeverie nuk janë realizuar, është një dështim total. Banka Zhvillimore dhe Fondi Sovran jam i lumtur që kanë dështuar. Kjo është një qeveri e cila nuk do të mund të menaxhonte ato institucione në mënyrën më të duhur. Jam i mendimit se ato dy institucione nuk duhet as të ekzistojnë fare sepse do të centralizonin kontrollin e sektorit ekonomik në duart e 10 apo 15 njerëzve, një gjë e cila edhe Kushtetuta e Republikës së Kosovës e mohon, nuk e lejon, sepse thotë që është ekonomi e tregut të lirë. Prandaj, nuk do duhej që e gjithë ekonomia e Kosovës të dominohej dhe kontrollohej nga 10 apo 15 njerëz..05:04 Po ashtu jemi dëshmitar që sa i përket investimeve të huaja, ato shumica dërmuese, shkojnë në blerjen e banesave, lokaleve nga mërgata jonë. Ndërsa projekte investive nga kompanitë e huaja serioze nuk kemi pasur asnjë të vetme në këto katër vite. Ka pasur trumbetime, riorganizime të agjencive brenda qeverisë, brenda ekzekutivit, por rezultati është zero”, thekson Mustafa.
Ai flet edhe për sfidat e bizneseve, për çfarë shton se kjo qeveri në vend që t’u hap shtigje të reja për të eksportuar produkte e shërbime, “ka izoluar Kosovën dhe bashkë me to edhe produktet dhe eksportin kosovar”.
Mustafa: Kjo qeveri në vend që t’u hap shtigjet e reja për të eksportuar produkte e shërbime e ka izoluar Kosovën
“E shoh që janë dëmtuar (bizneset) në çdo bisedë që mund të bësh me sektorin privat në Republikën e Kosovës, do të pranosh vetëm ankesa dhe deklarata për dështim ose dërgim të sektorit privat në dështim nga ana e kësaj qeverie. Në rrafshin e politikave fiskale nuk ka asnjë reformë, asnjë avancim, në rrafshin e përkrahjes së kompanive kosovare për të prodhuar, eksportuar qoftë produkte, shërbime, nuk ka asnjë avancim të vetëm. Në fakt ka një regres, sepse kjo është e vetmja qeveri në gjithë historinë moderne të Republikës së Kosovës, e cila ka masa nga BE. Në kontinentin evropian ekzistojnë vetëm dy shtete që kanë masa, Kosova dhe Bjellorusia që është aleate e Rusisë. Në këto masa të izolimit natyrisht se kompanitë kosovare e kanë të pamundur që të prodhojnë dhe eksportojnë produktet dhe shërbimet e tyre. Pra, kjo qeveri në vend që t’u hap shtigjet e reja për të eksportuar produkte e shërbime e ka izoluar Kosovën dhe bashkë me to edhe produktet dhe eksportin kosovar”, shton Mustafa.
Ndërsa, nënvizon se në rast se LDK fiton zgjedhjet më 9 shkurt 2025, do të fokusi do të jetë tek zhvillimi ekonomik i vendit, duke premtuar një qeverisje që do të mbështesë rritjen afatgjate ekonomike dhe përmirësimin e kushteve për bizneset kosovare.
Mustafa: LDK në këtë fushatë po punojmë shumë që të jemi partia e parë dhe që të udhëheqim Qeverinë e Kosovës
“LDK në këtë fushatë po punojmë shumë që të jemi partia e parë dhe që të udhëheqim Qeverinë e Kosovës në mandatin e ardhshëm katërvjeçar, jo për ndonjë arsyeje tjetër, pro për të realizuar programin tonë që quhet “Rruga e Re për Kosovën”. Një program me një pjesë substanciale tek zhvillimi ekonomik . Pra, po fillojmë me energjinë, një central me gaz në kapacitet prej 500 megavateve në vlerë prej 500 milionë eurove. Pse termocentral ose central me gaz? Sepse gazi do të jetë i importuar nga Amerika përmes Greqisë dhe Maqedonisë, pra përveç aspektit ekonomik, ka edhe aspektin gjeopolitik e strategjik të partneritetit Kosovë-Amerikë dhe tutje, dhe rritja e ndikimit ekonomik të Kosovës në regjionin e Ballkanit për të vazhduar pastaj tek Fondi në vlerë prej 120 milionë eurove ku do të trajnohen 40 mijë të rinj për t’u aftësuar në programim dhe zhvillim të softuerit dhe një mori masash tjera në aspektin e infrastrukturës, përfundimin e akseve kryesore, pra Prishtinë-Podujevë, Prishtinë-Mitrovicë, Prishtinë-Pejë, Prishtinë-Gjilan. Po ashtu në rrafshin e shëndetësisë, një spital i ri i Kosovës do të bëhet në Prishtinë, dhe projekte tjera, projekte kapitale për të gjeneruar rritje ekonomike”, nënvizon Mustafa.
Mustafa në fund thotë se kjo qeveri ka dështuar edhe në realizimin e projekteve kapitale.Zgjedhjet parlamentare në Kosovë mbahen më 9 shkurt të këtij viti.
