Dy kandidatë ia kanë mësyrë pozitës së drejtorit të QKUK-së, por Bordi drejtues i SHSKUK-së ende nuk e ka formuar komisionin përzgjedhës.
Dy kandidatë ia kanë mësyrë pozitës së drejtorit të Qendrës Klinike Universitare të Kosovës, u.d. i drejtorit aktual Osman Hajdari dhe dr. Gëzim Murseli, aktualisht drejtor në Qendrën Kombëtare të Mjekësisë Sportive, shkruan gazeta “Shneta”.
Konkursi i hapur në dhjetor të vitit të kaluar është mbyllur më 2 janar të këtij viti.
Tashmë janë bërë më shumë se dy javë nga mbyllja e afatit për dorëzimin e aplikacioneve, por procesi ende nuk ka vazhduar më tej.
Kjo për arsye se Bordi drejtues i Shërbimit Spitalor Klinik dhe Universitar, i cili e ka për detyrë që të emërojë komisionin për këtë konkurs, ende nuk e ka marrë këtë vendim.
Bazuar në Rregulloren 30/2024 për procedurën e pranimit të nëpunësve të shërbimit publik në sektorin e shëndetësisë, verifikimi i kandidatëve duhet të bëhet jo më larg se 15 ditë nga data kur është mbyllur afati për aplikim.
Emrat e kandidatëve për këtë pozitë ende nuk janë publikuar në uebfaqen e SHSKUK-së.
Gazeta e ka pyetur SHSKUK-në dhe Bordin drejtues në lidhje me këtë procedurë, por ende nuk kanë kthyer përgjigje.
