Në një postim të fundit në Facebook, Kryeministri Albin Kurti ndau lajmin për nënshkrimin e Marrëveshjes së Tregtisë së Lirë me Shoqatën Evropiane të Tregtisë së Lirë (EFTA) gjatë Forumit Ekonomik Botëror në Davos. Ai e cilësoi këtë si një moment historik për Kosovën, duke theksuar se vendi bëhet i pari në rajon që hyn në një partneritet të tillë për tregtinë e mallrave dhe shërbimeve me Islandën, Lihtenshtajnin, Norvegjinë dhe Zvicrën.
Kurti vuri në dukje rëndësinë e marrëveshjes për zhvillimin ekonomik të Kosovës, duke theksuar përfitimet për prodhuesit dhe kompanitë vendore. Ai falënderoi qeveritë e vendeve të EFTA-s dhe ministren e Tregtisë, Rozeta Hajdari, për përpjekjet e tyre në arritjen e kësaj marrëveshjeje.
Shkrimi i plotë nga postimi i Kryeministrit:
“Ditë historike në Davos – nënshkruam Marrëveshjen e Tregtisë së Lirë me shtetet anëtare të Shoqatës Evropiane të Tregtisë së Lirë (EFTA). Jemi vendi i vetëm në rajon që me shtetet e EFTA-s kemi marrëveshje edhe për tregti të mallrave edhe të shërbimeve.
Ajo paraqet kapitull të ri të forcimit të lidhjeve dhe shkëmbimeve ekonomike ndërmjet republikës sonë dhe Islandës, Lihtenshtajnit, Norvegjisë dhe Zvicrës, mundësi të madhe për prodhuesit dhe kompanitë vendore si dhe shtysë të fuqishme për zhvillimin e hovshëm ekonomik të vendit.
Falënderoj qeveritë e shteteve anëtare të EFTA-s dhe ministren tonë të Tregtisë, Industrisë dhe Ndërmarrësisë, Rozeta Hajdari për angazhimin e madh e me mirëbesim të plotë deri në arritjen e kësaj marrëveshjeje, nga e cila jemi të bindur që do të përfitojnë bizneset, industrinë dhe qytetarët e vendeve tona.”
