Kandidati për kryeministër dhe kryetari i Lëvizjes Vetëvendosje, Albin Kurti tha se me qeverinë e tij përfundon “epoka e institucioneve ilegale të Serbisë të Kosovë”.
Kurti në një tubim në Llabjan të Artanës tha se të tjerët para tij në pushtet, “e patën bërë Kosovën copë-copë”.
Kurti: Të tjerët e patën bërë Kosovën copë-copë
"Ata tjerët e patën bërë Kosovën, si buxhet e si territor e si institucione copë-copë. Ata edhe vetë janë copë-copë. Mos u merrni me ata fare...përfundimisht me qeverisjen tonë ka marrë fund ajo teza që është e mundshme edhe pazari me strukturat e Serbisë edhe puna për Republikën e Kosovës. Nuk është e mundshme edhe pazari me strukturat e Serbisë edhe angazhimi për shtetin e pavarur. Këto dy gjëra e përjashtojnë njëra-tjetrën. Populli ynë e ka një shprehje shumë të mirë thotë 'ai që mundohet me i mbajt dy kunguj nën një sqetull e ka edhe një kungull tjetër mbi qafë", deklaroi Kurti.
Kreu i Lëvizjes Vetëvendosje tha se kanë bërë shumë që të luftojnë grupet kriminale të Serbisë në Kosovë.
Kurti: Me qeverinë tonë përfundon epoka e institucioneve ilegale të Serbisë
"Në Kosovën e pavarur kanë operuar 28 komuna paralele dhe 5 qarqe të tyre. Me qeverinë tonë përfundon epoka e komunave e institucioneve ilegale të Serbisë në Republikën e Kosovës, e para dhjetë ditësh kemi mbyllur komunat paralele të Serbisë për Lipjan, Obiliq, Fushë Kosovë, Vushtrri, Novëbërdë ketu, Artanë, Kamenicë...sa shumë struktura ilegale e sa shume qarqe kriminale kish pasur të dashur qytetarë të Artanës, sa që nganjëherë të krijohet përshtypja qe me shumë ka pasur ilegale, paralele e kriminale se ksi shtetërore, zyrtare", shtoi ai në Llabjan.
Kandidatja për deputete, Albulena Haxhiu tha se gjatë këtij viti do të jetësohet Byroja për Konfiskimin e Pasurisë së Pajustifikueshme.
Haxhiu: Këtë vit do të jetësohet Byroja për konfiskimin e pasurisë
"Nuk e kemi ende zemrën plot sepse na kanë vonuar Byronë për Konfiskimin e Pasurisë së Pajustifikueshme. Por e kemi thënë, e thanë edhe në Viti, qe e kanë vonuar por jo edhe shumë gjatë sepse ky vit do të jetë viti kur Byroja për Konfiskimin e Pasurisë do të jetësohet dhe të gjitha ata qe kanë keqpërdorur me detyrën zyrtare do të përgjigjen para drejtësisë. Reforma është një hap i fuqishëm drejt krijimit të një drejtësie të vërtetë", tha ajo.
Në tubimin në Llabjan ajo tha se presin që 300 mijë gra e vajza të dalin te votojnë ne zgjedhjet e 9 shkurtit.
