Programin elektoral për zgjedhjet e 9 shkurtit, Koalicioni për Familje e shpalosi në qytetin e Gjilanit. Përfaqësuesit e këtij koalicioni deklaruan se do të angazhohen që t`i mbrojnë vlerat e familjes si dhe do t`u dalin në ndihmë kategorive të ndryshme shoqërore.
Koalicioni për familjen ka hapur fushatën zgjedhore në Gjilan. Gjatë takimit me përkrahës, bartësi i listës, Eman Rrahmani deklaroi se do te angazhohen për mbrojtjen e vlerave të familjes.
Edhe kandidati për deputet i këtij koalicioni, Ferid Agani, theksoi se kjo parti ka program që mbron familjen në frymë të shëndoshë.
Kandidati tjetër për deputet nga ky koalicion, Selim Pacolli tha se misioni i tyre është mbrojtja e familjes.
Për të mbështetur koalicionin për familjen, në Gjilan ishte edhe miku i Kosovës, Wiliam Walker.
“Gjatë vizitës që isha dje në Prishtinë, dëgjova shumë për partinë e familjes që ka të bëjë me deputet e juaj. Kjo më shtyri të vij dhe të vizitoj edhe Gjilanin, që ta vërtetoj entuziazmin që kanë qytetarët ndaj kësaj partie dhe ndaj deputetëve të tyre që mbrojnë familjen, prandaj votojeni", tha ai.
Në këtë tubim, u tha se pas 9 shkurtit, nuk do të lejohen agjendat që cenojnë integritetin e familjes.
Gjatë shpalosjes së programit ky koalicion premtoi se do të angazhohen edhe për t'iu dalë në ndihmë kategorive të ndryshme shoqërore.
