Kryetari i Komunës së Drenasit, Ramiz Lladrovci, së bashku me familjarë të dëshmorëve, martirëve, dhe qytetarë të shumtë, mirëpritën në vizitë në Shtëpinë Muze “Masakra e Poklekut” heroin e gjallë të Kosovës, William Walker.
Gjatë kësaj vizite historike, Walker u njoh nga afër me masakrën kundër njerëzimit në Poklek dhe dëshmitë që dokumentojnë tragjedinë.
Kryetari Lladrovci e vlerësoi si një hero me kontribut të jashtëzakonshëm për zbardhjen e krimeve serbe dhe për lirinë e Kosovës.
Ambasadori Walker, i njohur për rolin e tij kyç në ndërkombëtarizimin e krimeve të luftës në Kosovë, shprehu respektin e tij të thellë për viktimat dhe familjet e tyre. Ai theksoi rëndësinë e ruajtjes së kujtesës historike dhe vazhdimin e përpjekjeve për drejtësi.
Kujtojmë se masakra e Poklekut është një nga ngjarjet më tragjike të luftës së Kosovës, ku forcat serbe vranë 53 shqiptarë civilë, përfshirë 24 fëmijë të pafajshëm. Sipas dëshmive të të mbijetuarve, viktimat u mblodhën me forcë në një shtëpi, ku u qëlluan barbarisht dhe më pas u dogjën. Më i riu ndër ta ishte vetëm 8 muajsh.
