Aktori Çun Lajçi ka thënë se ne duhet të merremi me me fenomenin dhe jo me sallat sportive e zhurmaxhinjtë.
Sipas tij, të gjitha zhurmat, brohoritje, të sharat do të harrohen por “këto plagë do të mbesin si skenarë për filmat horror, që mbase një gjeneratë më e vetëdijshme se ne do t'i realizojë, për t’ua treguar nipërve dhe mbesave se kush ishim, ku ishim dhe si përfunduam duke sharë njëri-tjetrin, ndërsa i bënim qejfin atij që na dogji, na vrau e na i zhduku varret!”
Postimi i plotë:
Merruni me fenomenin, jo me hallat sportive e zhurmaxhinjtë!
* Do të ikë janari, e bashkë me të edhe zhurma e hallave sportive. Brohoritjet do të shuhen, e ata që u mbushën me entuziazëm për një joshje të vogël do të kthehen në rutinën e tyre, pa e ditur as vetë se çfarë dëgjuan, çfarë u premtua dhe kush gënjeu më shumë.
* Do të harrohet Donika e Jusufit dhe fjalët e saj të rënda për luftëtarin që pushka e bëri gjeneral, por do të harrohet edhe luftëtari që e quajti Albinin spiun të Serbisë.
* Po! Edhe ai gjenerali tjetër që tha "më shumë e respektoj një shka t'Beogradit se sa Albin Kurtin, edhe ai do t'bëhet harresë e keqe që kuterbonte vllavrasje!
Do të harrohen analistët që shanë Kosovën si të ishin të ardhur nga Shumadia, e në vend të tyre do të shfaqen imazhet e qerreve me buaj të muhaxhirëve nga Toplica, që dikur trokisnin dyerve të Prishtinës:
— Na bëni konak, se qerret i kemi me fëmijë e gra shtatzëna!
* Këto plagë do të mbesin si skenarë për filmat horror, që mbase një gjeneratë më e vetëdijshme se ne do t'i realizojë, për t’ua treguar nipërve dhe mbesave se kush ishim, ku ishim dhe si përfunduam duke sharë njëri-tjetrin, ndërsa i bënim qejfin atij që na dogji, na vrau e na i zhduku varret!
Hallat sportive do të harrojnë ofendimet e liderëve dhe premtimet e shkruara në copa letrash. Do të harrojnë brohoritjet e zbrazëta:
— Albin, Albin, Bedri, Bedri, Lumir, Lumir!
* Do të kalojë janari, e shkurti do të ikë. Do të shpërndahen zhurmaxhinjtë, ata që vrapuan nga qyteti në qytet për të mbushur sallat, për të luajtur rolin e telallëve:
— O popull, mblidhuni, rrihni tupanët e bërtisni: Rroftë Kapedani!
* Mua më kthehet në mendje shfaqja e Isuf Buxhovit "Gjon Nikollë Kazazi", e Çuni që shiste fyej e kavaj duke thirrur:
— O milet, në Gjakovë ka rënë murtaja!
* Po ik janari. Nëntë shkurti po vjen. Dhe fitoren do ta gëzojë ai që gënjeu më pak. Ai që vodhi më pak. Ai që ruajti kufirin. Ai që ujqit e Ibrit i çoi në Rashkë. Ai që foli pak dhe bëri shumë për Veriun.
* Po, do të fitojë i riu! Sepse e reja i duhet popullit, e vjetra duhet të mbetet histori — pak e dhimbshme, pak e idhët, e shumë pak e ëmbël!
- Cili është ai që nuk i mbushi xhepat me mëkate që do të festojë fitoren?
- Ate e din populli dhe popullit duhet t’i besojmë!
Ave të mirës! Ave Kosovës!
* Merruni me fenomenin, jo me hallat sportive e zhurmaxhinjtë, se iu del më mirë!
29.01.2025
