William Walker, ish-ambasador i OSBE-së në Kosovë, ka dëshmuar të mërkurën para Gjykatës Themelore në Prishtinë.
Këtë e ka konfirmuar për “Betimi për Drejtësi“, zëdhënësja e kësaj Gjykate, Mirlinda Gashi, e cila bëri të ditur se dëshmia e Walker u dha pas kërkesës së Prokurorisë Speciale për mundësi hetuese të veçantë për marrjen e deklaratës së tij.
Aty u bë e ditur se rasti është i mbyllur për publikun.
“Ju njoftojmë se pas kërkesës së Prokurorisë Speciale të Republikës së Kosovës për mundësi hetuese të veçantë për marrjen e deklaratës së dëshmitarit W.W, Gjykata Themelore në Prishtinë – Departamenti Special është duke mbajtur seancën për mundësi hetuese të veçantë për marrjen e deklaratës së dëshmtarit W.W, i cili ka të bëjë me krime lufte. Rasti është i mbyllur për publikun”, konfirmoi Gashi.
Pika 1 e nenit 149 “Mundësia hetuese e veçantë” e Kodit të Procedurës Penale përcakton se “Përjashtimisht, prokurori i shtetit, viktima, mbrojtësi i viktimave, i pandehuri ose mbrojtësi i tij mund të kërkojë që gjyqtari i procedurës paraprake të merr dëshmi nga dëshmitari ose të kërkojë ekspertizë me qëllim të ruajtjes së provës kur ekziston një mundësi e veçantë për marrjen e provës së rëndësishme ose kur ka rrezik të konsiderueshëm se kjo provë nuk do të mund të merrej gjatë shqyrtimit gjyqësor“.
