Një incident ka ndodhur së fundmi në Skenderaj, ku një poster i liderit të Lëvizjes Vetëvendosje, Albin Kurti është djegur.
Ky akt, vjen pak ditë pas tubimit të LVV-së në Skenderaj, ku edhe kishte hedhje të mjeteve piroteknike si kundërshtim ndaj kryeministrit Kurti.
E në lidhje me këto ngjarje në Skenderaj, ka reaguar Halil Geci.
Ai në një postim në Facebook, i cilësoi këto si sulme të vazhdueshme kundër kryeministrit, ku edhe për thirrje për marrje të masave ndaj këtyre akteve, të cilat i cilësoi si kriminale.
“Incidentet e fundit në Skenderaj, përfshirë djegien e posterit të kryeministrit Albin Kurti dhe sulmet me mjete piroteknike gjatë tubimeve të Lëvizjes Vetëvendosje, janë veprime të papranueshme që dëmtojnë imazhin e Drenicës heroike. Këto akte vandalizmi dhe dhune nuk përfaqësojnë vlerat e qytetarëve të Skenderajt dhe janë në kundërshtim me traditën e mikpritjes dhe respektit të kësaj zone”, shkroi Geci, përcjell “Bota sot”.
Shkrimi i plotë
Sulmet e vazhdueshme në Skenderaj kundër kryeministrit Kurti: Nevoja për veprim të ashpër kundër akteve kriminale
Djegia e posterit të kryeministrit Albin Kurti në Skenderaj është një akt i papranueshëm që dëmton imazhin e Drenicës heroike.
Më 9 shkurt, qytetarët e Kosovës do t’i djegun përmes votës së tyre, duke mbështetur drejtësinë dhe rendin.
Incidentet e fundit në Skenderaj, përfshirë djegien e posterit të kryeministrit Albin Kurti dhe sulmet me mjete piroteknike gjatë tubimeve të Lëvizjes Vetëvendosje, janë veprime të papranueshme që dëmtojnë imazhin e Drenicës heroike. Këto akte vandalizmi dhe dhune nuk përfaqësojnë vlerat e qytetarëve të Skenderajt dhe janë në kundërshtim me traditën e mikpritjes dhe respektit të kësaj zone.
Është thelbësore që organet e rendit të kryejnë hetime të plota dhe të paanshme për të identifikuar dhe ndëshkuar autorët e këtyre veprimeve kriminale. Çdo përpjekje për të destabilizuar procesin demokratik dhe për të krijuar tensione politike duhet të dënohet ashpër nga të gjitha palët dhe qytetarët.
Në prag të zgjedhjeve të 9 shkurtit, është e rëndësishme që fushata zgjedhore të zhvillohet në një atmosferë të qetë dhe demokratike, ku debatet dhe konkurrenca politike të bazohen në ide dhe programe, jo në akte dhune apo intimidimi. Vetëm në këtë mënyrë mund të sigurojmë një proces zgjedhor të drejtë dhe të lirë, që pasqyron vullnetin e vërtetë të qytetarëve.
Drenica ka një histori të pasur të rezistencës dhe heroizmit, dhe nuk duhet lejuar që veprime të tilla të njollosin këtë trashëgimi. Është detyrë e secilit prej nesh të promovojmë paqen, tolerancën dhe respektin për mendimet e ndryshme, duke kontribuar kështu në ndërtimin e një shoqërie më të drejtë dhe demokratike.
