Përgatitja e padisë për gjenocid kundër Serbisë ka mbetur më shumë si një nismë retorike.
Kështu thuhet në analizën e programit të Qeverisë së Kosovës 2021-2025 të realizuar nga Lëvizja Fol.
Drejtoresha e kësaj organizate, Mexhide Demolli tha se programi i qeverisë është përballur me sfida serioze.
"Ndër sfidat kryesore janë vonesat në miratimin e politikave, defektet legjislative dhe mungesa e koordinimit ndër-institucional. Programi i Qeverisë ka paraparë dy prioritet kryesore të asaj kohe që kanë qenë menaxhimi i pandemisë COVID 19 dhe ringjallja ekonomike. Kurse, sa i përket aspektit sektorial, Programi i Qeverisë është i ndarë në 18 prioritete", tha ajo.
Po ashtu, ajo përmendi edhe vonesën në miratimin dhe zbatimin e ligjeve, ku theksoi se numër i madh i projektligjeve janë kontestuar për shkelje procedurale dhe janë dërguar në Gjykatën Kushtetuese.
"Për shembull, në dhjetor të vitit të kaluar, një grup deputetësh dorëzoi 16 projektligje në Gjykatën Kushtetuese, duke e akuzuar qeverinë për mosrespektim të procedurave ligjore. Gjykata Kushtetuese ka shfuqizuar gjithashtu disa nëne të rëndësishme, duke i konsideruar ato në kundërshtim me Kushtetutën. Ndër to janë Ligji për Byronë e Konfiskimit të Pasurisë së Pajustifikueshme dhe Ligji për Këshillin Prokurorial të Kosovës, të cilat konsideroheshin kyçe për reformën në sundimin e ligjit. Shfuqizimi i këtyre ligjeve ka nxjerrë në pah jo vetëm mungesën e përgatitjes teknike të qeverisë, por edhe dobësinë në sigurimin e një konsensusi më të gjerë politik dhe institucional për miratimin e tyre", shtoi ajo.
