LIVE: KQZ-ja përditëson rezultatet preliminare të zgjedhjeve - Nis numërimi i votave për deputetë

Në orën 19 përfunduan zgjedhjet parlamentare në të cilat njëzetetetë subjekte politike me 1.280 kandidatë, garuan për të siguruar ulëse në parlamentin 120 vendesh të Kosovës.

Mijëra vëzhgues vendas e ndërkombëtarë, në mesin e të cilëve mbi 100 të dërguar nga Bashkimi Evropian dhe 18 nga Këshilli i Evropës ndoqën procesin në mbi 940 qendra votimi që qëndruan të hapura nga ora shtatë e mëngjesit deri në orën 19:00.

Rreth 40 për qind e rreth dy milion votuesve të regjistruar hodhën votën e tyre në këto zgjedhje që pasuan një fushatë të rreptë të partive politike, të cilat për një muaj me radhë u zotuan për rritje pagash e pensionesh, përmirësim të arsimit dhe shërbimeve shëndetësore dhe për të luftuar papunësinë në vendin më të varfër në Evropë.

LIVE REZULTATET

Zgjedhjet e sotme, të nëntat me radhë që nga përfundimi i luftës së viteve 1998-1999 që mori fund me ndërhyrjen e NATO-s, u panë si një sprovë për kryeministrin Albin Kurti, partia e të cilit fitoi me një rezultat të thellë në vitin 2021 dhe u vu në përpjekje për një mandat tjetër.

Kjo është hera e parë që nga shpallja e pavarësisë së Kosovës në vitin 2008, që parlamenti i Kosovës përmbushi mandatin e plotë katërvjeçar.

Votimet e sotme do të përcaktojnë se kush do të udhëheqë Kosovën në bisedimet për normalizimin e marrëdhënieve me Serbinë, të cilat kanë ngecur për një kohë të gjatë. Shtetet e Bashkuara dhe Bashkimi Evropian u kanë kërkuar të dyja palëve të zbatojnë marrëveshjen e arritur gati dy vjet më parë sipas së cilës Kosova duhet të themelojë një Asociacion të Komunave me shumicë serbe, ndërsa Beogradi të njohë ‘de facto’ pavarësinë e Kosovës.

Kryeministri Albin Kurti është kritikuar nga fuqitë perëndimore për veprimet qeverisë së tij në veriun e vendit të banuar me shumicë serbe. Bashkimi Evropian vazhdon të mbajë në fuqi masa ndëshkuese ndaj Kosovës që nga qershori i vitit 2023 për shkak të tensioneve në veri. Por, bisedimet me Serbinë nuk gjetën shumë vend në fushatën para zgjedhjeve.

Dhjetë nga 120 vendet në parlamentin e Kosovës janë të rezervuara për partitë e komunitetit serb, dhjetë të tjera për komuniteteve tjera pakicë. Rreth 100 mijë qytetarë serbë me të drejtë vote patën mundësinë të zgjedhin mes gashtë partive politike nga radhët e këtij komuniteti.

Analistët serbë thanë se në këto zgjedhje pati një pluralizëm më të madh demokratik.

Partitë opozitare kritikuan qeverinë Kurti për marrëdhëniet me aleatët posaçërisht me Shtetet e Bashkuara, të cilat gjatë administratës së ish Presidentit Joe Biden, tërhoqën vërejtjen se veprimet e autoriteteve të Kosovës në veriun e vendit të banuar me shumicë serbe, kishin ndikuar në cilësinë e partneritetit dhe paralajmëruan Prishtinën se mospajtimet pengojnë angazhimin e tyre për të ndihmuar përparimin e Kosovës drejt integrimeve euro-atlantike.

Çështja e këtyre marrëdhënieve u bë objekt diskutimesh këto ditë pas dy postimeve në rrjetin social X nga i dërguari i Presidentit Trump për misione të posaçme Richard Grenell, i cili në administratën e parë ishte i dërguari i posaçëm për dialogun Kosovë – Serbi. Sipas tij marrëdhëniet janë në pikën më të ulët, ndonëse qeveria e Kosovës ngulë këmbë se janë shumë të mira.

Është përmbyllur procesi i votimeve për zgjedhjet parlamentare në orën 19:00 në të gjitha vendvotimet në vend, teksa në disa qendra votimi po vazhdon ende, aty ku kanë mbetur qytetarë në radhë për të votuar.  

Numri i qytetarëve me të drejtë vote në vendvotime ishte 1 milion e 970 mijë e 944 votues, derisa për herë të parë votën e tyre kanë mundur ta hedhin 125 mijë e 852 votues të rinj.

Ndërkohë, Komisioni Qendror i Zgjedhjeve ka paralajmëruar konferencë për media në orën 19:30, ku do të prezantojë të dhënat e daljes së qytetarëve në këto zgjedhje.

Live rezultatet

Sipas raportimeve të Demokracisë në Veprim (DnV), procesi i votimit në Kosovë po zhvillohet në mënyrë të qetë dhe pa incidente të theksuara që nga hapja e vendvotimeve.

Deri në orën 17:00, 38.9% e qytetarëve me të drejtë vote, nga gjithsej 1,970,944 votues të regjistruar, e kanë shfrytëzuar të drejtën kushtetuese për të votuar.

Dalja e votuesve ka qenë mbi mesataren në rajonin e Prishtinës, ku pjesëmarrja ka tejkaluar 46%, si dhe në rajonin e Ferizajt.

LIVE REZULTATET

Në rajonet e Gjilanit dhe Mitrovicës së Jugut DNV kanë raportuar një dalje mesatare, ndërsa rajonet e Prizrenit, Pejës dhe Gjakovës kanë shënuar një pjesëmarrje nën mesatare.

DnV gjithashtu ka raportuar për disa vështirësi që kanë hasur votuesit për të gjetur emrin e tyre në listën zgjedhore dhe për të identifikuar vendvotimin e saktë.

Këto vështirësi mund të jenë rezultat i ndryshimeve në Qendrat e Votimit nga ana e Komisionit Qendror të Zgjedhjeve (KQZ).

Sot qytetarët e Kosovës po e ushtrojnë të drejtën për të votuar.

Ambasadori britanik në Kosovë, Jonathan Hargreaves, ka shkuar në Novobërdë të Gjilanit, për të përcjellë nga afër procesin e votimeve.

“Kanë mbetur edhe 90 minuta për të shfrytëzuar të drejtën për të dalë dhe votuar”, ka shkruar ambasadori në Facebook ku ka shpërndarë edhe disa fotografi.

“Ishte e mrekullueshme të isha me ekipin tonë në Novobërdë dhe Gjilan, duke parë shumë njerëz nga komunitete të ndryshme duke bërë pikërisht këtë”, ka shkruar ai më tej.

LIVE REZULTATET

Largimi i tavolinave informuese nga qendrat e votimit ka shkaktuar konfuzion te qytetarët, në zgjedhjet e sotme parlamentare. Një gjë e tillë nga ndodhur në qendrën e votimit “Shaban Hashani” në komunën e Ferizajt.

Kryesuesja e kësaj qendre, Hajrije Nebihu tha për kp se votimi në këtë qendër ka nisur me kohë, mirëpo problem ka qenë mungesa e tavolinës informuese për qytetarët e cila është larguar nga KQZ-ja.

Kjo sipas saj ka bërë që shumë qytetarë “të presin me orë të tëra dhe në fund të kuptojnë se s’kanë të drejtë vote këtu”.

Krahas kësaj, si problem për qytetarët ajo e shfaqi edhe mungesën e vendvotimeve në katin e parë, gjë e cila ka vështirësuar votimin në katin e dytë për personat më të moshuar.

Nebihu: Qytetarët me orë të tëra kanë pritur dhe në fund kanë kuptuar se nuk do të votojnë këtu

“Votimet kanë filluar me kohë dhe kemi qenë të përgatitur. I kemi gjashtë vendvotime, deri këtu jemi mirë por me disa pengesa dhe vërejtje që i kemi pasur. Mirëpo në përgjithësi procesi deri tani ka shkuar shumë mirë. Në katin e parë nuk kemi klasë, pra nuk kemi vendvotime. Sivjet na ka penguar shumë por ka qenë problem tavolina ndihmëse që është larguar nga KQZ-ja. Kemi raste të shumta që presin me orë dhe në fund kuptojnë se nuk do të votojnë këtu. Ky ka qenë problemi kryesor”, tha ajo.

Megjithatë, ajo tha se deri në orën 15:00 në këtë qendër kanë votuar 1 mijë e 602 votues nga gjithsej 5 mijë e 115 qytetarë me të drejtë vote.

Nebihu: Vërehet një fluks më i madh për të votuar

“Deri në orën 15:00 kemi pasur 1 mijë e 602 votues me të drejtë vote. Krahasuar me zgjedhjet e vitit 2021 vërehet një fluks më i madh”, theksoi Nebihu.

Në Ferizaj të drejtë vote kanë 118 mijë e 288 votues, në 44 qendra të votimit me 152 vendvotime.

Kandidati për deputet i Listës Serbe, Milan Kostiç, ka thyer heshtjen zgjedhore. Ai ka publikuar një thirrje për të votuar partinë e tij.

Përveç kësaj, ai u ka sugjeruar serbëve numrat për të cilët ata duhet të votojnë.

I njëjti i është drejtuar serbëve në Kosovë edhe me një mesazh nacionalist.

“Të gjithë për Serbinë”, ka shkruar ai krahas fotografisë dhe numrave që ai ka sugjeruar e të cilat i ka rrethuar si thirrje për t’i votuar.

Me Ligjin e ri sipas nenit 37, heshtja zgjedhore fillon nga hapja e Qendrave të Votimit në orën 07:00, e deri në mbylljen e tyre në orën 19:00.

Gjatë kësaj periudhe kohore nuk lejohet asnjë fushatë aktive, e po ashtu edhe informimi për sondazhet është i ndaluar.

Sot qytetarët e Kosovës po e ushtrojnë të drejtën për të votuar.

Komisioni Qendror Zgjedhor (KQZ) ka bërë të ditur se deri në orën 15:00 kanë votuar 28.32 për qind, apo mbi 558 mijë 246 votues, në zgjedhjet e sotme parlamentare.

Zëdhënësi i KQZ-së, Valmir Elezi ka thënë se në zgjedhjet e vitit 2021 deri në orën 15:00 kishin votuar 567 mijë e 934 votues.

Krahasuar me vitin 2021, janë rreth 9 mijë e 688 vota më pak në zgjedhjet e sotme deri në orën 15:00.

Për zgjedhjet për Kuvendin e së Kosovës, që po mbahen sot në vendin tonë Prokurori i Shtetit ka bërë të gjitha përgatitjet e nevojshme për të realizuar mbrojtjen e votës, tha prokurorja, Laura Pula.

“Në tërë Republikën e Kosovës po kujdestarojmë deri në 100 prokurorë në 38 komuna. Është e vërtete se nga ora 7 e mëngjesit jemi gardianë të ruajtjes së votës së sovranit. Po mundohemi të jemi aty në momente kritike specifike e të iniciojmë çdo rast që ka të bëjë me shkelje eventuale kundër të drejtës së votimit që përbën një kapitull të posaçëm nga kodi penal i RKS e që ka hiq më pak se 11 vepra penale, kundër të drejtës së votimit”, tha Pula.

Ajo tha se deri rreth orës 15 janë arrestuar gjashtë persona, në tri raste, të cilët janë në ndalim, me qëllim të mbledhjes së hetimeve.

Pula tha se këto raste nuk mund t’i konsiderojnë të vogla apo të mëdha, por a mund të prishin imazhin.

Qytetarët e Komunës së Gjakovës po e shfrytëzojnë të drejtën e votës për zgjedhjet e sotme parlamentare.

Sipas të dhënave të orës 17:17 nga Komisioni Qendror i Zgjedhjeve (KQZ), dalja në Komunën e Gjakovës është 25.01 për qind ose 29 mijë e 824 qytetarë.

Në Komunën e Gjakovës të drejtë vote kanë gjithsej 119 mijë e 237 qytetarë.

Kosova sot po voton për zgjedhjet parlamentare të cilat mbahen për herë të parë si të rregullta pas shpalljes së pavarësisë.

Në zgjedhjet e 14 shkurtit 2021 të drejtë vote kanë pasur 1 milion e 794 mijë e 862 qytetarë. Pjesëmarrja e qytetarëve në këtë proces zgjedhor ka qenë 48,78 % apo 903,379 votues. Në garën zgjedhore të vitit 2021, kanë qenë 21 parti politike, 2 koalicione dhe 5 iniciativa qytetare.

Ndërkaq, në zgjedhjet e 6 tetorit të vitit 2019 dalja në votim ishte 44.56 për qind apo 826,916 mijë qytetarë.

Deri në orën 11 në zgjedhjet e 14 shkurtit 2021 kanë votuar 8.30 për qind e votuesve apo 145 mijë e 650 votues. Deri në të njëjtën kohë në zgjedhjet e parakohshme për Kuvendin e Kosovës të vitit 2019 kishin votuar 9.64 për qind apo 174 mijë e 669 votues.

Në zgjedhjet e 14 shkurtit, deri në orën 15:00 kanë votuar 32,32 për qind apo 567 mijë e 934 votues nga 1 milion e 794 mijë e 862 me të drejtë vote. Deri në të njëjtën kohë, në zgjedhjet e parakohshme për Kuvendin e Kosovës të vitit 2019, kishin votuar 29,28 për qind e votuesve apo 554 mijë e 750 votues nga 1 milion e 961 mijë e 214 qytetarë me të drejtë vote.

Qytetarët e Komunës së Ferizajt po e shfrytëzojnë të drejtën e tyre për të votuar në zgjedhjet e sotme për Kuvendin e Kosovës.

Dalja e qytetarëve në votime është 31.89 për qind ose 37 mijë 723 nga gjithsej 118 mijë 288 qytetarë me të drejtë vote.

Komisioni Qendror Zgjedhor ka përditësuar të dhënat më të reja të orës 17:05.

Komisioni Qendror i Zgjedhjeve njofton se dalja e votuesve në nivel vendi në zgjedhje deri në orën 15:00 është 28.32 për qind.