Uebfaqja zyrtare e Komisionit Qendror të Zgjedhjeve (KQZ) ka pësuar probleme teknike, duke pamundësuar qasjen e qytetarëve në rezultatet paraprake të zgjedhjeve.
Sipas raportimeve, platforma në të cilën publikohen të dhënat në kohë reale për numërimin e votave nuk është e qasshme, duke shkaktuar shqetësim dhe pakënaqësi te qytetarët dhe partitë politike që janë në pritje të rezultateve zyrtare.
Kur përdoruesit tentojnë të hyjnë në uebfaqe, shfaqet një mesazh ku thuhet: “Ka ndodhur një gabim. Ju lutem provoni më vonë”. Deri më tani, nuk ka ndonjë reagim zyrtar nga KQZ-ja për shkaqet e këtij problemi apo për kohën e rikthimit në funksion të platformës.
Ky incident ka ngjallur dyshime dhe spekulime në rrjetet sociale, me disa përdorues që po e lidhin rënien e faqes me ngarkesën e lartë të trafikut, ndërsa të tjerë e shohin si një mungesë transparence në procesin zgjedhor.
Mbetet për t’u parë nëse KQZ-ja do të japë një sqarim për situatën dhe kur do të rikthehet funksionaliteti i uebfaqes për publikun.
