Publicisti dhe analisti Milaim Nela ka reaguar në lidhje me zgjedhjet e fundit në Kosovë, duke e cilësuar LDK-në dhe kreun e saj, Lumir Abdixhikun, si humbësit më të mëdhenj të procesit zgjedhor. Në një postim në rrjetet sociale, ai ka kritikuar ashpër qëndrimet e LDK-së, veçanërisht për afërsinë me Edi Ramën dhe vendimet politike që, sipas tij, nuk janë në interes të Kosovës.
Nela vuri në pikëpyetje si është e mundur që LDK-ja të mbajë marrëdhënie të afërta me kryeministrin shqiptar, Edi Rama, i cili sipas tij ka mbajtur qëndrime kundër Kosovës për më shumë se një dekadë. Ai gjithashtu kritikoi vendimin e LDK-së për të mbështetur marrëveshjen e asociacionit të komunave me shumicë serbe, një marrëveshje e trashëguar nga koha e Isa Mustafës si kryeministër.
"Si mundet LDK dhe Lumir Abdixhiku të dalë kundër qeverisë së Kosovës për menaxhimin e veriut të Kosovës?" – shkroi Nela, duke e cilësuar këtë si një veprim që dëmton interesat kombëtare.
Analisti theksoi se partitë opozitare kudo në botë mbrojnë vendimet që janë në interes të vendit të tyre, por sipas tij, LDK po vepron ndryshe duke humbur besimin e votuesve.
Në fund të postimit të tij, ai falënderoi qytetarët për pjesëmarrjen në zgjedhje, duke shprehur bindjen se votuesit kosovarë nuk gabojnë në vendimmarrjen e tyre. Ai gjithashtu shpreson që Komisioni Qendror i Zgjedhjeve (KQZ) ta menaxhojë procesin zgjedhor në mënyrë korrekte dhe transparente deri në fund.
Reagimi i Milaim Nelës ka ngjallur debate në opinionin publik, duke thelluar diskutimet mbi rolin e opozitës në skenën politike të Kosovës.
