Kryetari i LDK-së, Lumir Abdixhiku, në një postim në Facebook, falënderoi të gjithë votuesit për mbështetjen e dhënë, duke theksuar se kjo mbështetje ishte një nder për Lidhjen dhe demokracinë e Kosovës. Ai gjithashtu shprehu mirënjohjen për veprimtarët e LDK-së, të cilët punuan me përkushtim dhe emocion gjatë këtyre zgjedhjeve.
“Punuam mbarë. Ecëm drejtë. Ecëm si qytetarë me ëndrra të mëdha për këtë Republikë,” shkruan Abdixhiku.
Ai thekson me krenari rrugëtimin e bërë deri tani.
Megjithatë, Abdixhiku pranon se, pavarësisht rritjes së partisë, kjo nuk është e mjaftueshme për të sjellë ndryshimin e nevojshëm në Republikë, duke shprehur një ndjenjë keqardhje për këtë fakt.
Kryetari i LDK-së u shpreh optimist, duke shtuar se, pavarësisht sfidave, do të ketë dritë përpara. Ai përfundoi duke theksuar se numërimi i votave të mbetura, përfshirë ato nga mërgata, është ende në proces dhe se, pas përfundimit të këtij procesi, LDK do të ofrojë qëndrimet e saj politike.
Postimi i plotë:
Të gjithë votuesve tanë, ju faleminderit që mbështetët Lidhjen tonë. Të gjithë qytetarëve të Kosovës, ju faleminderit që nderuat demokracinë e atdheut tonë. Të gjithë veprimtarëve tanë ju faleminderit që punuat me kaq vullnet e me kaq emocion në këto zgjedhje. Asgjë mangut!
Punuam mbarë.
Ecëm drejtë.
Ecëm si qytetarë me ëndrra të mëdha për këtë Republikë.
Shpresoj të ju kem prirë mbarë; shpresoj të ju kem përfaqësuar siç keni merituar gjithnjë!
E shoh me plot krenari rrugëtimin e bërë deri më tani. Nuk dijmë ndryshe, nuk duam ndryshe, nuk duhet ndryshe.
Rritja jonë i jep mundësi e qetësi organizimit më të mirë të brendshëm partiak - dhe për këtë do të qëndroj gjithmonë krenar; por kjo rritje është e pamjaftueshme për ndryshimin e Republikës në këtë fazë - dhe për këtë ndjejë keqardhje.
Pavarësisht të gjithave,
Do të ketë dritë!
Në këtë fazë, vazhdojmë me numërimin e votave të mbetura; sidomos ato në mërgatë. Pas numërimit përfundimtar, LDK do të ofrojë qëndrimet e veta politike.
