Kryetari i Partisë Demokratike të Kosovës, Memli Krasniqi, falënderoi qytetarët, anëtarët dhe aktivistët për mbështetjen e tyre në rrugëtimin politik. Ai vlerësoi kulturën demokratike dhe angazhimin e tyre, duke theksuar se mbi 200 mijë vota për PDK-në janë një "zotim, shpresë dhe përgjegjësi e madhe për të nesërmen."
Në fjalën e tij, kreu i PDK-së theksoi se ky proces ishte më shumë se një garë politike, duke e konsideruar atë si një "përpjekje e përbashkët për një Kosovë më të mirë."
Krasniqi i shprehu mirënjohjen për kulturën demokratike që qytetarët treguan, duke e falënderuar veçanërisht Bedri Hamzën për fushatën e tij "unifikuese, profesionale dhe të vendosur për të mirën e vendit."
Ai theksoi se mbi 200 mijë vota janë më shumë se një rezultat, duke i konsideruar ato si një "zotim, shpresë dhe përgjegjësi e madhe për të nesërmen," dhe se kjo është një "fitore e besimit dhe përkushtimit ndaj një Kosove më të mirë."
"Për çdo hap dhe sakrificë në këtë rrugëtim, ju jam mirënjohës pafundësisht. Rrugëtimi ynë për #MaMirë vazhdon. Për Kosovën. Për të ardhmen. Për qytetarët. Ky është vetëm fillimi i një kapitulli të ri për vendin tonë. Me zemër dhe me besim të palëkundur në potencialin e Kosovës dhe të qytetarëve tanë të mrekullueshëm, do të ecim përpara", përfundoi Memli Krasniqi.
