Numrimi i votave të zgjedhjeve të 9 shkurtit është afër përfundimit, shkruan "Bota sot".
Eugen Canolli, hulumtues i lartë në Institutin Demokratik të Kosovës (KDI), ka treguar ndarjen e mandateve në Kuvendin e Kosovës për partitë shqiptare.
Postimi i plotë:
Tashmë që rezultatet e vendvotimeve të rregullta në Kosovë pothuajse janë përfundimtare, ndarja e mandateve në Kuvendin e Kosovës për partitë shqiptare është:
1. LVV – 47 deputetë
2. PDK – 25 deputetë
3. LDK – 20 deputetë
4. AAK – 8 deputetë
Edhe pse ende mbeten në kalkulim rreth 100-120 mijë vota, përfshirë ato jashtë vendit dhe votat me kusht, ndikimi i tyre në rezultatin përfundimtar do të jetë margjinal.
Derisa votat me kusht ndjekin të njëjtin trend si votat e rregullta, në votat jashtë vendit LVV tradicionalisht performon dukshëm më mirë (bazuar në rezultatet e zgjedhjeve të kaluara). Specifikisht:
• Nëse LVV fiton rreth 60% të votave jashtë vendit, mund të marrë deri në dy mandate shtesë, duke arritur në gjithsej 49 deputetë.
• Në variantin më pozitiv për LVV, kur fiton mbi 75% të votave jashtë vendit, mund të arrijë deri në 51 deputetë.
• Ndërsa, në variantin negativ për LVV-në, kur merr më pak se 50% të votave jashtë vendit, mund të bjerë në 46 mandate.
Përndryshe, votat/përqindja e partive që nuk e kalojnë pragun as nuk shpërndahen e as nuk i shtohen ndonjë partie tjetër – ato thjesht nuk llogariten gjatë ndarjes së mandateve.
