Partia Demokratike e Kosovës (PDK) ka mbajtur mbledhjen e parë të Kryesisë pas zgjedhjeve të 9 shkurtit, ku është vlerësuar fushata zgjedhore, angazhimi i jashtëzakonshëm i strukturave dhe janë diskutuar hapat e ardhshëm politikë.
Sekretarja e Përgjithshme e PDK-së, Vlora Çitaku, në një konferencë për media, ka shprehur mirënjohjen e thellë të partisë për mbi 200 mijë qytetarë që i besuan PDK-së me votën e tyre, duke e bërë këtë rezultatin më të mirë të partisë që nga viti 2014.
“Ky rezultat është dëshmi e rikthimit të besimit të qytetarëve dhe e rritjes sonë të jashtëzakonshme. PDK nuk e sheh këtë sukses si përmbyllje, por si një fillim të ri,” u shpreh Çitaku.
Ajo ka falënderuar kandidatin e PDK-së për Kryeministër, Bedri Hamzën dhe Kryetarin e PDK-së, Memli Krasniqi, për një fushatë pozitive dhe të bazuar në programin e qartë për një Kosovë më të mirë, si dhe të gjithë kandidatët, anëtarët, aktivistët dhe votuesit e PDK-së për angazhimin e tyre.
“PDK është e gatshme, me kandidatin tonë për Kryeministër, Bedri Hamzën, të marrë përgjegjësinë e qeverisjes dhe ta çojë Kosovën përpara”.
“Preferojmë një koalicion me partitë opozitare dhe përjashtojmë mundësinë e koalicionit me Lëvizjen Vetëvendosje, mirëpo hapat kushtetues dhe ligjor janë të qartë, të përfundojë procesi i numërimit të votave e të bëhet legjitimimi i deputetëve të rinj e më pas fillojnë konsultat dhe bisedimet me partnerët eventual të koalicionit që do të udhëhiqet nga Bedri Hamza”, ka thënë ajo.
Sekretarja e Partisë Demokratike të Kosovë siguroi të gjithë se çdo vendim politik do të merret nga organet e partisë, dhe i cili do të jetë transparent për publikun.
“Çdo vendim politik i PDK-së do të merret nga organet e partisë, duke u bazuar në interesin e qytetarëve dhe vizionin për një qeverisje të përgjegjshme dhe zhvillimore”, tha Çitaku.
Në këtë kontekst, Çitaku i bëri thirrje Komisionit Qendror të Zgjedhjeve që të sigurojë numërimin e saktë të çdo vote dhe të ruajë integritetin e procesit zgjedhor, duke garantuar respektimin e vullnetit të qytetarëve.
“PDK do të vazhdojë të jetë zëri i qytetarëve, të mbrojë interesat e tyre dhe të punojë për një të ardhme më të mirë për Kosovën,” përfundoi Çitaku.
Partia Demokratike e Kosovës mbetet e përkushtuar për një qeverisje të përgjegjshme dhe zhvillimore, duke u bazuar në interesat e qytetarëve dhe vizionin për një Kosovë më të mirë.
