Pritja për 17 shkurtin i bashkon Kurtin e Osmanin, i dërgojnë mesazh Serbisë

Në kuadër të aktiviteteve për shënimin e 17-vjetorit të pavarësisë, ashtu si dhe vitet e kaluara, u mbajt pritja shtetërore. Krerët e shtetit, përfaqësues të institucioneve, ambasadorë të huaj në vend dhe aktorë politikë e të fushave të tjera u mblodhën për të festuar këtë ditë historike për Kosovën.

Presidentja e Kosovës, Vjosa Osmani, gjatë fjalës së saj theksoi se kjo ditë është një nga më të rëndësishmet për popullin dhe shtetin e Kosovës. Ajo kujtoi sakrificat e të gjithë atyre që dhanë jetën për lirinë e Kosovës dhe theksoi se Republika e Kosovës është dhe do të mbetet një histori suksesi. 

"Për 17 vjet kjo ditë shënohet si dita më domethënëse. Sot jemi mbledhur për ta festuar bashkërisht ditën e pavarësisë. Sot në çdo rrugë dhe në çdo shesh triumfon dashuria për Kosovën. E kjo dashuri na ka mbajtur dhe na mban të fortë. 17 vjet më parë Kosova i tha gjithë botës njëzëri se do të jetë gjithmonë e lirë, e pavarur dhe sovrane. Kujtimi për secilin dëshmor të UÇK-së është përgjithmonë i gdhendur. Në këtë përvjetor le të kujtojmë jo vetëm sakrificën e atyre që dhanë gjithçka për lirinë, por edhe përgjegjësinë që kemi secili për ta ndërtuar një Kosovë që ecën krenare drejt familjes euroatlantike. Kosova është shtëpia jonë, krenaria jonë më e madhe. Krah për krah me aleatët tanë do të ecim përpara. Le ta dëshmojmë para botës se Kosova është dhe do të mbetet histori suksesi", deklaroi presidentja Osmani.

Ndërsa, Presidenti i Shqipërisë, Bajram Begaj, vlerësoi pavarësinë e Kosovës si testament të qëndresës dhe sakrificës së popullit kosovar. Ai nderoi figurat historike të Kosovës, si Ibrahim Rugova, Adem Demaçi, Adem Jashari, dhe të gjithë dëshmorët dhe luftëtarët që dhanë jetën për lirinë e Kosovës.

"Pavarësia e Kosovës është testament i qëndresës, amanet i ngadhënjimit të sakrificës dhe besimit në drejtësinë e popullit për të jetuar të lirë," u shpreh ai.

Begaj shtoi se sanksionet e BE-së ndaj Kosovës duhet të hiqen, pasi që janë bërë në mënyrë jo të drejtë. Sipas tij, Kosova dhe Shqipëria është aleati besnik i SHBA-ve dhe BE-së.

Ndërkohë, kryeministri i Kosovës, Albin Kurti, tha se 17 Shkurti i vitit 2008 shënoi një moment historik për popullin e Kosovës, një ditë që erdhi pas një shekulli qëndrese dhe sakrificash. Ai theksoi se kjo ditë është një mundësi për të kujtuar dhe nderuar të gjithë ata që dhanë jetën për lirinë e Kosovës, përfshirë dëshmorët, të zhdukurit dhe të burgosurit politikë.

"Ne kemi detyrë të përfaqësojmë edhe aspiratën e gjithë atyre që janë përpjekur për krijimin e një shteti sovran. Republika ka dorëzuar aplikimin për tu anëtarësuar në BE, edhe pse 5 shtete anëtare nuk na njohin ne. Kosova mbështet luftën e drejtë dhe mbrojtëse të Ukrainës, edhe pse nuk kemi njohje prej saj. Republika po bën përpjekje maksimale për respektimin e të drejtave të njeriut, luftën kundër korrupsionit, zhvillimin ekonomik dhe barazi", theksoi Kurti.

Në një fjalim të mbajtur gjatë pritjes shtetërore për nder të 17-vjetorit të Pavarësisë së Kosovës, Presidenti i Republikës së Shqipërisë, Bajram Begaj, theksoi se Pavarësia e Kosovës është një testament i qëndresës dhe një ngadhënjim i sakrificave të popullit të Kosovës për liri dhe dinjitet. Ai nderoi figurat kryesore të luftës dhe pavarësisë, duke përkujtuar Ibrahim Rugovën, Adem Jasharin dhe dëshmorët e tjerë, të cilët dhanë jetën për ardhmërinë e Kosovës.

Në fjalën e tij, Presidenti Begaj theksoi bashkëpunimin e fortë të Shqipërisë dhe Kosovës, si dhe angazhimin e përbashkët për forcimin e aleancave strategjike dhe integrimin e Kosovës në strukturat ndërkombëtare. Ai theksoi se Shqipëria do të mbetet gjithmonë pranë Kosovës në çdo hap të saj drejt zhvillimit dhe njohjes ndërkombëtare.

Begaj përmendi gjithashtu se qytetarët e dy shteteve presin më shumë bashkëpunim konkret, përmirësime ekonomike dhe lehtësim të proceseve, duke theksuar rëndësinë e ruajtjes dhe zhvillimit të gjuhës shqipe si një aset të pazëvendësueshëm për kombin tonë.

Në përmbyllje, Presidenti shprehu krenarinë për arritjet e kombit shqiptar dhe angazhimin për të punuar së bashku për paqen, demokracinë dhe prosperitetin, duke përfunduar me urimin për një të ardhme të begatë për Kosovën dhe shqiptarët.

Fjala e Presidentit të Republikës Bajram Begaj në pritjen shtetërore me rastin e 17- vjetorit të Pavarësisë së Kosovës

Pavarësia e Kosovës është testament i qëndresës, amanet i shenjtë, ngadhënjim i sakrificës dhe besimit në të drejtën e një populli autokton për të jetuar i lirë, me dinjitet dhe në një shtet të barabartë mes të barabartëve.

Pavarësia e Kosovës erdhi si meritë e përpjekjeve titanike të një populli që nuk u përkul dhe nuk u dorëzua kurrë ndaj padrejtësive dhe gjenocidit.

Sot e përjetë nderojmë arkitektin e pavarësisë së Republikës së Kosovës, Ibrahim Rugovën, liderin dhe Presidentin historik të Kosovës, dhe Adem Demacin, nderojmë komandantin legjendar Adem Jashari dhe Ushtrinë Çlirimtare të Kosovës, nderojmë gjakun e dëshmorëve dhe sakrificat për një të ardhme në liri të mijëra burrave dhe grave, nderojmë lotët dhe dhimbjet e nenave, nderojmë firmëtarët e pavarësisë.

26 vite më parë, çështja e Kosovës bashkoi shtete dhe kombe. Me mbështetjen e aleatëve tanë Euroatlantikë dhe me ndërhyrjen unike vendimtare të NATO-s kundër terrorit, krimeve të luftës dhe gjenocidit serb u hap rruga e lirisë, u krijua shteti i Kosovës, arritje e madhe për kombin shqiptar në këtë shekull.

Republika e Kosovës gjithnjë e më shumë është kontribuuese e paqes, dialogut dhe bashkëjetesës. Ajo ka forcën, kurajën dhe vizionin të shohë përpara. Kosova ka provuar se jo vetëm di të kërkojë, të mbrojë e të respektojë lirinë dhe demokracinë, por edhe të përmbushë përgjegjësitë ndaj qytetarëve të saj dhe ndaj komunitetit ndërkombëtar.

Shqipëria dhe Kosova, faktori shqiptar në rajon, është aleat besnik i Shteteve të Bashkuara të Amerikës dhe Bashkimit Evropian, aleat i përkushtuar i Aleancës Euroatlantike dhe vlerave të saj në rajon. Shqiptarët do të jenë përgjithnjë mirënjohës për mbështetjen e tyre të pakursyer. Ne besojmë se Evropa e Bashkuar është destinacioni ynë strategjik dhe jetik, është një projekt në shërbim të paqes, demokracisë, sigurisë, stabilitetit e prosperitetit. Shqiptarët besojnë në Bashkimin Evropian, në vlerat që ai përfaqëson, si dhe në përkushtimin për zgjerim, por mosnjohja e shtetit të Kosovës është akt që bie ndesh me këtë përkushtim. Dëshirojmë që këto vende të rishikojnë qëndrimet e tyre dhe, gjithashtu, Bashkimi Evropian të heqë sanksionet e vendosura padrejtësisht ndaj shtetit të Kosovës.

Duhet të jemi shumë të kthjellët për vlerat tona Euroatlantike dhe duhet të punojmë pareshtur për forcimin e aleancave tona strategjike. Paqja, liria dhe demokracia janë realitete që duhen ushqyer e mbrojtur kurdoherë, me të gjitha fuqitë tona.

Shqipëria do të jetë gjithnjë pranë Kosovës, në të gjitha përpjekjet e arritjet e saj. Ne do të përkrahim dhe mbështesim kurdo dhe kudo Republikën e Kosovës, në çdo iniciativë integrimi rajonal, në organizatat ndërkombëtare, në rrugën drejt integrimit evropian dhe për njohje të reja. Bashkëpunimi ynë është përgjegjësi, është rruga drejt forcimit të vetë shteteve tona për fuqizimin e ndikimit të faktorit shqiptar në rajon e më gjerë, por edhe për forcimin e kombit shqiptar. Ky bashkëpunim ka një potencial të jashtëzakonshëm të pashfrytëzuar plotësisht, e mbi të gjitha ne kemi një xhevahir, që është gjuha shqipe, e cila duhet ruajtur, zhvilluar, pasuruar, e trashëguar.

Qytetarët tanë presin më shumë ndërveprim dhe bashkëpunim, më shumë rezultate të prekshme dhe shkëmbime ekonomike, më shumë lehtësim në tregje dhe nisma të përbashkëta, më pak burokraci apo keqkuptime.

Ne shqiptarët, përgjatë gjithë historisë sonë të lashtë, nuk kemi pasur nga askush dhurata politike. Na është dashur të luftojmë për të drejtat tona më themelore: lirinë, pavarësinë, gjuhën tonë. Sot kemi arritur t’i gëzojmë. Për këtë jemi krenarë. E me këtë krenari të mbajmë edhe përgjegjësi për sfidat që kemi përpara.

Ta duam kombin shqiptar me fuqinë hyjnore, të punojmë së bashku me fuqinë njerëzore për të ruajtur lirinë, për të forcuar paqen, demokracinë dhe stabilitetin, të punojmë së bashku për prosperitet dhe integrim, të jemi ndërtues të së ardhmes së begatë të kombit shqiptar.

Urime, Kosovë, 17-vjetorin e Pavarësisë!

Gëzuar përjetë Pavarësinë, Republikë e Kosovës, shtet i pavarur, sovran dhe demokratik!

Lavdi heronjve të Pavarësisë!

Zoti e bekoftë Kosovën dhe qytetarët e saj!

Kryeministri Albin Kurti tha se Pavarësia e Kosovës ka ardhur si rezultat i një qëndrese të paepur të popullit shqiptar ndaj sunduesve të huaj.

“17 vite më parë u shpall Pavarësia e Republikës sonë. Lindja e saj ishte rrjedhojë e gati një shekulli qëndrese të paepur të popullit tonë ndaj sundimit të huaj, dhunës së padrejtësisë thuajse të përditshme dhe ndërmarrjeve gjenocidale për ta zhbërë atë”,  ka thënë Kurti në pritjen shtetërore të liderëve kosovarë në nder të Pavarësisë.

“Kur Republika u shpall nga Kuvendi i Kaçanikut më 1990, ajo jo vetëm që ishte legjitime, por përbënte edhe një formulë të drejtë dhe të arsyeshme drejt zgjidhjes së çështjes shqiptare nën Jugosllavi”.

“Mirëpo, popullit tonë iu deshën të bëjë sakrifica të tjera gjatë viteve të 90-ta për të jetësuar Republikën dhe njohjen ndërkombëtare”.

Presidenti shqiptar, Bajram Begaj, tha se Pavarësia e Kosovës ka ardhur si meritë e një përpjeje ttanike të një populli të padorëzueshëm.

“Pavarësia e Kosovës erdhi si meritë e përpjekjeve titanike të një populli që nuk u përkul dhe nuk u dorëzua kurrë ndaj padrejtësive dhe gjenocidit”, ka thënë Begaj në pritjen shtetërore të liderëve kosovarë në nder të Pavarësisë së Kosovës.

“Sot e përjetë nderojmë arkitektin e Pavarësisë së Republikës së Kosovës, Ibrahim Rugovën, liderin dhe presidentin historik të Kosovës, dhe Adem Demaçin, nderojmë komandantin legjendar, Adem Jasharin e Ushtrisë Çlirimtare të Kosovës”.

Begaj po ashtu nderoi dëshmorët dhe të gjithë ata që sakrifikuan për pavarësinë e vendit.

Në 17 vjetorin e Pavarësisë së Kosovës, Presidentja Vjosa Osmani ka deklaruar se 17 shkurti i vitit 2008 ndryshoi fatin e Kosovës përgjithmonë, duke shtuar se liria e vendit bartë edhe vulën e shteteve aleate.

Në pritjen shtetërore në shënim të kësaj dite, Osmani tha se aleatët qëndruan me popullin e Kosovës në ditët më të vështira.

“Liria jonë bartë edhe vulën e aleatëve tanë të cilët qëndruan me popullin tonë në ditët më të vështira, e të cilët vazhdojnë të qëndrojnë me ne të palëkundur. Ata ishin me ne në vitet më të errëta të historisë sonë, e vazhdojnë të qëndrojnë pranë popullit tonë përderisa Republika jonë shkruan kapituj të ri e vendimtarë në forcimin e shtetit”, tha Osmani.

Ajo tha se vendi do të ec përpara krah për krah me aleatët.

“Kosova është shtëpia jonë, krenaria jonë dhe përgjegjësia jonë më e madhe. Bashkë që të gjithë, me vendosmëri e unitet, krah për krah me aleatët tonë, do të ecim përpara. Sot e përherë le ta mbajmë lart flamurin e Republikës sonë dhe le ta dëshmojmë para botës se Kosova është dhe do të mbetet histori suksesi, një dritë shprese dhe një forcë e pathyeshme”, deklaroi Osmani.

Osmani tha se në këto 17 vite, Kosova ka ecur përpara.

“Rinia jonë ka shkëlqyer në sport, në shkencë, në art dhe në çdo fushë tjetër. Gratë tona me guxim e vision janë bërë shtylla të pandashme të zhvillimit të shtetit tonë…17 Shkurti sot e përgjithmonë është zotim për të ndërtuar një të ardhme ku çdo qytetar jeton me dinjitet, mundësi të barabarta e besim të plotë në shtetin e tyre”, shtoi ajo.