Presidenti i Ukrainës, Volodymyr Zelensky, tha të mërkurën se presidenti i SHBA-së, Donald Trump, ka ngecur në një “hapësirë dezinformimi” dhe hodhi poshtë një pretendim të presidentit amerikan se popullariteti i Zelenskyt ishte vetëm 4 për qind.
Zelensky, i cili thuhet se ka përkrahje prej 57 për qind të popullsisë sipas një sondazhi të një institucioni kërkimor në Kiev, tha se përpjekjet për ta zëvendësuar atë nuk do të funksiononin, një ditë pasi Trumpi tha se Ukraina duhet të mbajë zgjedhje.
Lideri ukrainas, në komentet e tij të para si përgjigje ndaj Trumpit, tha se presidenti amerikan po përsëriste dezinformata, të cilat, sipas tij, vinin nga Moska.
“Duke qenë se po flasim për 4 për qind... E kemi parë këtë dezinformim, e kuptojmë që vjen nga Rusia”, tha Zelensky në një konferencë shtypi të transmetuar në televizionin shtetëror ukrainas.
“Presidenti Trump… për fat të keq jeton në këtë hapësirë dezinformimi”, shtoi ai.
Një natë më parë, Trumpi kishte lënë të kuptohet se ai fajëson Ukrainën për nisjen e luftës. Ai nuk e sqaroi se çfarë nënkuptonte me këtë, por shpesh ka lënë të kuptohet se lufta filloi për shkak të dëshirës së Ukrainës për t’u anëtarësuar në NATO.
Ekspertët thonë se pushtimi i plotë nga Rusia u nxit nga ambiciet imperialiste të Putinit dhe jo nga aspirata e Ukrainës për NATO-n, e cila kishte pak mbështetje nga Perëndimi në atë kohë.
Trump e kishte bërë atë koment pas përfundimit të bisedimeve në Riad midis sekretarit amerikan të Shtetit, Marco Rubio, dhe zyrtarëve të tjerë amerikanë, si dhe një delegacioni rus të udhëhequr nga ministri i Jashtëm, Sergei Lavrov.
Zelensky tha të mërkurën se rezultati i negociatave midis përfaqësuesve të Shteteve të Bashkuara dhe Rusisë në kryeqytetin saudit, Riad, ishte heqja e izolimit ndërkombëtar të liderit rus, Vladimir Putin.
“Mendoj se Putini dhe rusët janë shumë të lumtur, sepse çështja po diskutohet me ta si një ‘viktimë’, kjo është diçka e re”, tha Zelenskyy në një konferencë shtypi në Kiev më 19 shkurt.
Në bisedimet në Riad, që ishin takimet e para zyrtare të nivelit të lartë midis Uashingtonit dhe Moskës që nga pushtimi i vitit 2022, Rusia dhe Shtetet e Bashkuara ranë dakord të krijojnë ekipe negociuese për të gjetur një rrugë për t’i dhënë fund luftës “sa më shpejt të jetë e mundur”, tha Rubio.
Rubio theksoi nevojën për përmirësime në ambasadat e SHBA-së dhe Rusisë për të krijuar misione që mbështesin bisedimet e paqes, marrëdhëniet dypalëshe dhe bashkëpunimin në një kuptim më të gjerë.
Disa liderë evropianë, të alarmuar nga ndryshimi radikal në politikën e SHBA-së ndaj Rusisë, kanë frikë se Uashingtoni do të bëjë lëshime serioze dhe do të rishkruajë strukturën e sigurisë së kontinentit./REL
