Procesi i numërimit të votave për zgjedhjet e 9 shkurtit vazhdon në Qendrën e Numërimit Komunal në Ferizaj. Deri tani janë numëruar 113 kuti votimi, ndërsa 13 janë ende në proces, dhe 26 kuti nuk janë numëruar ende.
Në Qendrën e Numërimit Komunal në Ferizaj po vazhdon numërimi i votave për kandidatët e subjekteve politike për zgjedhjet e 9 shkurtit. Në Ferizaj janë 152 kuti votimi, deri më tani janë numëruar 113 kuti, ndërsa 13 kuti janë në proces numërimi dhe 26 kuti ende nuk janë numëruar.
Procesi i numërimit po mbikëqyret edhe nga shoqëria civile, e cila thekson se, përkundër disa problemeve teknike, procesi po zhvillohet mirë.
“Në këtë qendër ka pasur raste kur ka rënë sistemi për arsye teknike nga KQZ-ja, por nuk ka pasur asnjë problem nga qendra ‘Bill Clinton’, pasi ambienti ka qenë i përshtatshëm, me ngrohje, ndryshe nga shumë qendra të tjera ku ka munguar ngrohtësia dhe funksionimi i energjisë elektrike. Për fat të mirë, në këtë qendër kemi pasur shumë transparencë, më shumë se në shumë qendra të rajonit dhe të Kosovës, duke mundësuar zhvillimin e një procesi shumë më të mirë dhe duke rritur transparencën dhe përgjegjshmërinë e stafit, vëzhguesve, komisionerëve dhe KKZ-së,” deklaroi Kanan Gashi nga AVONET.
Në bazë të dinamikës së punëve, numërimi i votave për kandidatët në Ferizaj pritet të përfundojë deri të premten.
