Deklarata e kreut të Nismës Socialdemokrate, Fatmir Limaj, se është i hapur për bashkëpunim edhe me Albin Kurtin ka ngjallur reagime të shumta në media dhe opinionin publik. Ky qëndrim i Limajt nuk ishte i pritur, duke qenë se ai më parë ka mbajtur një distancë nga qeverisja e Kurtit. Për më tepër, ky zhvillim shihet si një lëvizje që nuk i shkon për shtat presidentit serb, Aleksandar Vuçiç, i cili është kundër rikandidimit të Kurtit për një tjetër mandat si kryeministër.
Pas kësaj deklarate, reagimet në media nuk kanë munguar. Disa prej tyre, të dyshuara si të financuara nga burime të dyshimta, kanë vënë në pikëpyetje sinqeritetin e këtij qëndrimi të Limajt, duke e cilësuar atë si një manovër taktike. Kritikët e tij thonë se një koalicion i mundshëm mes Limajt dhe Kurtit do të ndryshonte dinamikën politike në vend dhe do të krijonte një ekuilibër të ri në skenën parlamentare.
Ndërkohë, mbështetësit e kësaj ideje e shohin si një hap pragmatik për të siguruar stabilitetin politik në Kosovë, duke argumentuar se Limaj po vendos interesin kombëtar mbi përplasjet politike të së kaluarës.
Pritet të shihet nëse ky qëndrim do të kthehet në një lëvizje konkrete politike apo në një kalkulim afatshkurtër për të testuar opinionin publik.
Reagimet e analistëve pas deklaratës së Fatmir Limajt për bashkëpunim me Kurtin
Deklarata e Limajt ka shkaktuar reagime të shumta nga analistë, gazetarë dhe figura politike. Disa prej tyre e kanë kritikuar ashpër këtë qëndrim, ndërsa të tjerë e kanë interpretuar si një hap të papritur nga lideri i NISMËS. Më poshtë janë disa nga reagimet më të spikatura:
▶︎ Astrit Gashi: "Albin jam i gatshëm me të shërby", kështu la të kuptohet sonte
Gazetari Astrit Gashi komentoi deklaratën e Limajt në emisionin “Debat Plus”, duke sugjeruar se ai ishte i gatshëm të bashkëpunonte pa kushte me Kurtin. “Albin jam i gatshëm me të shërby… kështu e la të kuptohet Fatmir Limaj sonte në Debat Plus. Nisma me deputetët e saj, nuk paska vija të kuqe. Limaj deri më tani është lideri i vetëm opozitar që nuk përjashtoi bashkëpunimin me VV dhe Albin Kurtin”, shkroi Gashi.
▶︎ Dardan Molliqaj: Nga çelik në bakër, shumë shpejt
Kryetari i PSD-së, Dardan Molliqaj, reagoi ashpër ndaj Limajt, duke përdorur një metaforë për të ilustruar ndryshimin e qëndrimeve të tij. “Nga çelik në bakër, shumë shpejt!”, shkroi Molliqaj, duke ironizuar mbi imazhin e mëparshëm të Limajt si një figurë e fortë politike.
▶︎ Valon Syla: NISMA po luan fëlliqt
Gazetari Valon Syla kritikoi qëndrimin e Limajt, duke thënë se NISMA po vepron në mënyrë jo parimore. “O gajret Komandant Çeliku se po na del Komandant Plastika. Inspiruar nga qëndrimi i Fatmir Limajt në media. Nisma po luan flliqt, ju kam thënë”, ka shkruar Syla.
▶︎ Lirim Mehmetaj: Nuk besoj që është hajvan
Gazetari Lirim Mehmetaj e krahasoi situatën me një deklaratë të mëparshme të Albin Kurtit, ku ky i fundit kishte quajtur partitë opozitare “hajvana”. “Unë nuk e besoj që Fatmir Limaj bëhet me Albin Kurtin. Nuk e besoj që është hajvan”, shkroi Mehmetaj.
Reagimet e shumta tregojnë se qëndrimi i ri i Fatmir Limajt ka sjellë një valë debatesh dhe spekulimesh mbi të ardhmen politike të NISMËS dhe ndikimin e saj në skenën parlamentare.
